Трамп ги опиша републиканците како „глупаци и изроди“

Доналд Трамп драматично го подигна влогот за изборите во 2024 година, предупредувајќи дека тој е единствениот кандидат кој може да ја спаси Америка од „воинствените“ демократи и „фанатиците и глупаците“ на мејнстрим Републиканската партија, објави АФП. На Конференцијата за политичка акција на конзервативците Трамп рече дека Американците се „во епска борба да ја спасат  земјата од луѓе кои ја мразат и сакаат целосно да ја уништат“.

„Имавме Републиканска партија што ја водеа изроди, неокони, глобалисти, фанатици на отворени граници и морони“, рече тој, наведувајќи неколку традиционални партиски преставници. Американските гласачи, рече Трамп, се уморни од „вкоренетите политички династии во двете партии, од гнилите специјални интереси, од политичарите кои ја сакаат Кина“ и поддржувачите на „бескрајните странски војни“.

„Ќе имаме Трета светска војна ако нешто не се случи брзо“, предупреди тој потврдувајќи дека не ја одобрува американската помош за Украина.

„Јас сум единствениот кандидат кој може да го даде ова ветување: ќе ја спречам Третата светска војна“, рече Трамп.

Трамп зборуваше околу 100 минути за да го затвори четиридневниот настан кој се одржува на кратко растојание од главниот град на нацијата, Вашингтон.

До неодамна, Конференцијата за политичка акција на конзервативците беше главниот собир на конзервативните лидери во Америка, но беше зафатена од екстремно десничарското движење на Трамп „Направи ја Америка повторно голема“, поради што  експертите неодамна го нарекоа настанот „MAGApalooza“.

„Ќе го завршиме она што го започнавме“, рече Трамп кога излезе на сцената, поттикнувајќи скандирања „Уште четири години, уште четири години!“.

На собирот имаше говори од некои од најискрените поддржувачи на Трамп во земјата – па дури и поразениот поранешен претседател на Бразил Жаир Болсонаро – иако многу потенцијални кандидати за 2024 година и раководството на Републиканската партија ја прескокнаа конвенцијата. Состанокот привлече помали толпи од вообичаеното, покренувајќи прашања за неговата континуирана релевантност бидејќи многу од говорите беа одржани пред празни редови седишта.

Но, просторијата беше преполна кога Трамп го изложи својот случај за втор мандат, додека се соочува со обвиненија за обид за кражба на изборите во 2020 година преку криминален заговор во повеќе фази, што вклучуваше поттикнување бунт. Во најголем дел, тој ја повторуваше истата линија на теории за заговор за изборна измама и жалби против органите на прогонот и обвинителите на „радикалната левица“.

Составот на панелисти кои излегоа на сцената пред обраќањето на Трамп ослободи лавина теории на заговор и анти-трансродова реторика додека говорниците се пофалија со своите христијански принципи.Гувернерот на Флорида Рон ДеСантис и поранешниот потпретседател Мајк Пенс, кои ја предводат групата против Трамп, го прескокнаа настанот за да избегнат понижување поради исвиркувањето од обожавателите на поранешниот претседател. Трамп не ги спомна ниту едниот ниту другиот по име, збунувајќи ги очекувањата на аналитичарите кои очекуваат дека ќе ги нападне.

Но, делегатите постојано ја исвиркуваа неговата единствена најавена противкандидатка од Републиканската партија, Ники Хејли, за време и по нејзиното појавување на конвенцијата.

Поранешниот главен стратег на Трамп, Стив Банон, и неговиот познат сојузник Мајк Линдел, беа третирани како членови на кралското семејство додека шетаа по ходниците на Конвенцискиот центар проповедајќи негирање на изборите.

„Ова нема да бидат фер избори“, изјави Линдел за „Франс прес“ за изборите  во 2024 година. „Но, кога 90 отсто од луѓето во оваа земја го сакаат Доналд Трамп, тој сепак мора да победи, дури и на манипулирани избори“, рече тој.

„Во 2016 година изјавив: Јас сум твојот глас. Денес додавам: Јас сум твојот воин. Јас сум твојата правда. А за оние  кои згрешија и  изневерија: Јас сум твојата одмазда“, рече Трамп. „Ќе ја уништам „длабоката држава“ целосно. Ќе ги отпуштам неизбраните бирократи и силите во сенка кои го окупираа нашиот правосуден систем.И ќе ги вратам луѓето на чело на оваа земја“, додаде тој.