ССМ „изгласа“ минималец за функционерите, бара достоинствени примања за работниците

Сојузот на синдикати на Македонија, денеска од улица побара од пратениците во Собранието, од работодавачите во Стопанската комора, и пред се од Владата, да ја зголемат минималната плата на 500 евра, а останатите плати за 100 евра, а доколку тоа не биде направено, не ја исклучија можноста за генерален штрајк и протести. Со многу симболика и пораки до надлежните во државата, како што е одлука за минимална плата за пратениците и за функционерите, органите и телата на ССМ на јавна седница на три локации во Скопје (пред Собранието, Стопанската комора и Владата) повикаа на почитување на колективните договори, и враќање на достоинството на работниците.

Собирот, симболично почна во 12 часот и пет минути пред Работничкиот дом, каде што е седиштето на ССМ, каде што претседателот на ССМ, Слободан Трендафилов ја отвори јавната седница на органите и телата на ССМ предложувајќи три точки на дневен ред: не може да има за пратениците, а да нема за работниците; подадената рака од работникот денес може да стане стисната тупаница утре; и трета точка не може да се одлучува за работниците без работниците, која како најважна беше наменета за Владата. Секоја од трите точки беше елаборирана на одделни локации – првата пред Собранието, втората пред Стопанската комора на Македонија и третата пред Владата.

На собирот со едноминутно молчење им беше одадена почит на трагично загинатите во трагедијата во Кочани, а на повредените им посакаа брзо закрепнување.

„Конечно работниците излегоа на улица да бараат плата. Нападите кои ги упатуваат кон нас се само поради тоа што бараме достоинствени плати за достоинствен живот“, рече Трендафилов, пред присутните да се упатат кон Собранието.

Таму, тој им се обрати на пратениците со „непочитувани“, порачувајќи дека се дојдени пред законодавниот дом да побараат од нив да донесат одлука минималната плата да изнесува не помалку од 500 евра и да се зголемат сите останати плати за 100 евра.

„Денеска дојдовме тука ние што одлучуваме во синдикатите дека платите се мизерни, вашите сега 79 проценти зголемени плати не ги заслужувате и затоа дојдовме тука поради фактот што вие не одлучувате за нас, ние ќе одлучиме за вас“, рече Трендафилов.

Симболиката на собирот, се гледа и од повикот присутните синдикалци да донесат одлука пратениците да бидат на минимална плата до наредното зголемување на минималната плата.

„Констатирам дека органите и телата на ССМ, органите и телата на гранските синдикати и луѓето кои не поддржуваат, едногласно ви донесоа одлука да си ги намалите вашите луксузни пратенички плати на минимална плата, сѐ додека не ги зголемите работничките плати“, рече Трендафилов.

За втората точка се расправаше пред Стопанската комора.

„Денеска сме тука пред вас да ви подадеме рака да ги зголемите нашите плати, за нашите работници да останат во Македонија, да не бидете најголемите виновници за иселувањето од Македонија во наредниот период, да не бидете виновни за работничкиот егзодус“, рече Трендафилов.

Пред присутните се обратија и потпретседателот на ССМ за приватниот сектор, кој на бизнисмените прво им се обрати со гласно „УААА“, што беше прифатено од присутните, потоа еден од свиркачите на синдикатот, и претседателот на СИЕР, како претседател на најголемиот синдикат во приватниот сектор.

Тое порачаа дека во нашата држава и ненормалното стана нормално.

„Секоја година по 10 илјади млади работници се иселуваат од нашата држава. Затоа не ги замолуваме, упатуваме апел до овие работодавачи, најголемата Стопанска комора во Македонија, да излезат овде со нас и да им кажеме дека повеќе нема да работиме за тие мизерни плати. Верувајте младиот работник за 500 евра не сака ни да помириса компанија да дојде да работи. Затоа денешните 500 евра во наредниот период ќе бидат и 600 и 700 евра. Ние тука нема да застанеме бидете сигурни“, беше пораката упатена до бизнисмените, по што Трендафилов уште еднаш порача:

„Дозволете за последен пат да ви ја упатам работничката порака: Подадената рака од работникот денес може да стане стисната тупаница утре“.

Главните барања беа упатени во делот на протестот што се одржа пред Владата.

Таму Трендафилов, повторно користејчи симболика, рече дека од пред Работничкиот дом тргнале 300, а пред владата дошле 1.080, колку што се функционери.

„Еден на еден. Повлечете ја незаконската одлука за утврдување на висината на износот на минималната плата, по со време намалете си ги вашите плати на минимална плата, да почувствувате макар и една година колку им е тешко на работниците“, рече Трендафилов.

Тој исто така побара од Владата да запрат нападите врз синдикатите бидејќи на таков начин не се води демократија.

„Денеска сме тука да ви упатиме последна порака. Не може да се одлучува за нас без нас. ССМ пред две години организираше генерален штрајк во целиот јавен сектор. На чекор сме до генерален штрајк во целата држава. Дојдовме триста. Ќе дојдеме и 3.000, ќе дојдеме и 30 илјади“, рече првиот човек на ССМ, додавајчи дека денеска бараат од Владата да бидат луѓе онака како што биле избрани и да не се однесуваат кон работниците како кон луѓе од трета категорија.

Тој исто така додаде дека функционерите не заслужуваат 79 проценти зголемени плати, кога луѓето кои ги обезбедуваат добија десет, кога луѓето кои ги учат нивните деца добија седум отсто, кога другите добиваат мизерни 1.800 денари.

„Не ве биравме да водите кооперација, ве биравме да водите држава“, рече Трендафилов, прачувајќи дека се пред Владата како најголем работодавач во државата на 128 илјади работници. Тој исто така побара да се почитуваат колективните договори и да се зголемат платите во јавниот сектор.

На собирот пред Владата се обратија и потпретседателот на ССМ за јавен сектор, и претседателот на УПОЗ, Трпе Деаноски.

Тие рекоа дека ова е првата влада во историјата на Македонија која донесе одлука за минимална плата без учество на синдикатите, која смислено ја одзема репрезентативноста на ССМ, само да нема Економско социјален совет, прва која реши 129 илјади вработени во јавниот сектор кои зависат од минимална плата да ги остави, да ги „изедат“ газдите од приватниот сектор.

„Со 1.890 денари управа и правосудство, 98 отсто моментално вработени се под просек. Ако тоа не е срамота не знам штио е срамота“, рекоа тие.

Од собирот исто така беше упатена порака дека работниците бараат почитување на општиот колективен договор и раст на платите како што е предвидено.

„Просветните работници бараат почитување на колективните договори. Многу е јасно напишано – коефициент по минимална плата, тоа многу добро ви е познато“, рекоа синдикалците додавајќи дека актиулената власт пред две години, кога беше во опозиција, многу често го зборувала тоа на телевизија, но сега го заборавила.

„Но, тука сме ние да ве потсетиме“, порачаа од ССМ, додавајќи дека преку владините синдикати нема да дозволат да бидат одбегнати обврските кон просветните работници.

На крај лидерот на ССМ, Трендафилов упати уште една порака до Владата.

„Од нашиот труд е вашиот луксуз. Тоа што го предложив вчера, го предлагам и денес. Христијан и Слободан на минимална плата, најмалку 500 евра минимална плата во Македонија и 100 евра зголемување на сите останати плати. Дојдете да живееме како нас. А ние ќе живееме како вас. Или, ние 2.500 евра плата, или вие 500 евра. Сами бирате“, рече тој.

Трендафилов исто така рече не треба да се заборави дека работниците се тие што ги бираат оние што се на власт и дека „многу лесно како претходните, од удобната функционерска фотеља, ќе се сименете на тврдо работничко столче“.

„Утре ќе ги повикаме и работниците, ќе ги повикаме политичките партии кои во минатото на работничкиот грб ги кршеа нивните политички копја, да не добиваат политички поени туку сите заедно да застанат зад работниците и да изгласаат закон со кој ќе овозможат пристојни плати и достоинствени услови за работа“, рече Трендафилов.

Тој повтори, доколку не се исполнат барањата на работниците можен е генерален штрајк и протести.

„Нам не ни е потребна вашата поддршка за да креирате политички поени на наш грб. Потребни се на три места по 21 човек за да ја блокираме државата“, рече тој.

„Ве молам, извадете ги розовите наочари и погледнете ја реалноста. Очекуваме зголемување на платите. Не сме тука да ја рушиме Владата. Тука сме да извршиме притисок Владата да ги зголеми платите. Во спротивно си знаете и сами“, реше Трендафилов. (М.Ј.)

(Фото: Б. Грданоски)