Сообраќајниот тунел над Битола без светлосна сигнализација

Сообраќајниот тунел на обиколницата Прилеп-Ресен, над Битола е без светлосна и сообраќајна сигнализација, и е небезбеден.

Државниот пат на оваа делница е фреквентен, но обиколницата се користи со максимална претпазливост, реагираат учесници во сообраќајот, бидејќи како што посочуваат освен што тунелот е целосно неосветелен и без предупредувачка сообраќајна сигнализација, тој е и опасен бидејќи низ тунелот, во текот на денот, но и ноќе, се движи дел од локалното население.

За потсетување, пролетоска, жител од селото Ивањевци пријави дека во близина на тунелот, неколку лица фрлале тврди предмети кон неговото возило и го оштетиле, а настанот беше евидентиран во сообраќајниот билтен на СВР-Битола.

Сообраќајниот тунел на битолската обиколница се наоѓа кај месноста викана „Германски гробишта“, приодот по коловозот до тунелот често е неуреден со расфрлан смет и цврст отпад. Последен пат за подобрување на безбедноста на овој сообраќајниот тунел беше интервенирано во октомври 2016 година.