Со 20 милиони евра, ќе се гради подземна гаража под плоштадот „Скендербег“ во Скопје

Владата донесе одлука да одвои 20 милиони евра за изградба на подземна гаража под плоштадот „Скендербег“.

Овој повеќегодишен проект кој предвидува изградба на 371 паркинг-место, распоредени на две нивоа ќе се простира на повеќе од 13.000 метри квадратни. Соодветно, ќе има обезбедено места за лица со посебни потреби, рече министерот за животна средина и просторно планирање Изет Меџити, попладнево на прес-конференција.

Со овој проект Владата сака да ги намали проблемите со паркирање на жителите на Општина Центар и Општина Чаир, како и посетителите на Старата скопска чаршија.

Меџити рече дека проектот ќе се реализира во најбрз можен рок и на транспарентен начин. 

Проектот е готов, а дозвола треба да се обезбеди Министерството за транспорт и врски. Парите се обезбедени, па тендерот наскоро ќе биде објавен, а градежните работи треба да почнат на почетокот на следната година.