Смената на Весна Дамева ја нема во „Службен весник“

„Службен весник“ преку кусо соопштение дадено за Алсат потврдил дека досега Судскиот совет официјално не објавил разрешување на претседателката Весна Дамева.

Одлуката се однесува на 26 април кога со 7 гласа „за“ и на седница што ја водеше потпретседателот Селим Адеми се бараше разрешување на Дамева од функцијата претседател на Судскиот совет.

На последната седница пропадна изборот на новиот прв човек на оваа институција. Неофицијално, наследникот на Весна Дамева не е избран поради недостиг на гласови.

Согласно Законот за Судски совет, претседателот на ова тело се избира со 8 гласа „за“. Иако разрешувањето не е предвидено, досегашните практики докажаа дека за разрешување од функцијата претседател или член на советот потребни се 8 гласа „за“, додека предлагачот нема право на глас.