Скопје уживаше во „Аида“ на Верди на отворено, под ѕвездите (галерија)
Во изведба на солисти, хорот и оркестарот на Националната опера и балет синоќа на плоштадот „Мајка Тереза“ на платото пред Националната опера и балет, беше изведена операта „Аида“ од Џузепе Верди, на отворено под ѕвездите, под диригентство на Бисера Чадловска, во режија на Дејан Прошев.
Ремек делото „Аида“ е една од највеличествените оперски творби во музичката литература. Во музичка смисла „Аида“, според музиколозите е музичко чудо составено од мелодиска убавина и имагинативна оркестрација, накратко триумф на творечката имагинација.
-Овој пат, заради состојбата со пандемијата и пропратните протоколи, грандиозната „Аида“ беше конципирана во поинакво руво, во скратена концертна верзија, со мошне внимателен избор на оркестарски и солистички фрагменти, притоа не нарушувајќи ја главната нитка на содршжинскиот набој, наведуваат од МОБ.
Настапија солистите Благица Поп Томова, Зоран Сотиров, Даниела Дјакова од Бугарија, Игор Дурловски, Владимир Саздовски, Марјан Јованоски, Александра Лазаревска Василевски, хорот и оркестарот на Национална опера и балет.
