„Сивиер ведер“ ја објави временската прогноза за август. Еве што нѐ очекува

Најновата месечна временска прогноза за август покажува ладен почеток на месецот над централна Европа, но се очекува враќање на суптропски гребен по должината на подрачјето со низок притисок на север, што би можело да создаде услови за нов топлотен бран.
„Сивиер ведер“ (Severe Weather) ги анализираше досегашните временски аномалии и развојот на моделот на притисок, а потоа ја разгледа неделната прогноза за август и промените што се очекуваат во последната третина од летото.

„Severe Weather Europe“ е онлајн ресурс за временски прогнози, изгледи, долгорочни временски трендови, лоши временски услови и друго.

Многу топло лето досега

Метеролошкото лето ги опфаќа трите најтопли месеци од годината – јуни, јули и август. Се базира на реалните временски модели и температури. Со јуни и јули веќе зад нас, влеговме во последната третина од метеоролошкото лето.

Анализата на притисокот за јуни и јули покажува значителни разлики помеѓу северот и југот на Европа. Надпросечно силен суптропски гребен доминираше во јужните и централните делови на континентот, додека област со низок притисок повремено се задржуваше над северните области.

Ова доведе до невообичаено топол воздух над поголемиот дел од Европа, освен на далечниот североисток. Западно-централните области регистрираа температури над 40°C неколку дена, додека температурите над 30°C се задржаа невообичаено долго време дури и во Скандинавија.

Анализата на врнежите за летото досега покажува дека голем дел од јужна и делови од централна Европа добиле само 10-15% од нивната вообичаена количина. Областа од источна

Франција до Полска добила близу до просечни количини, благодарение на честите невремениња проследени со грмотевици, додека количините на североисток биле малку повисоки.

Модел на суша е јасно видлив над јужната половина од континентот, додека северните и источните делови добиле повеќе врнежи под влијание на низок притисок.

Првата недела од август

Прогнозата за аномалијата на притисокот за првата недела од август покажува развој на силен систем со низок притисок над северозапад, со пенетрација на постуден воздух во централна Европа. Во исто време, гребен се издига над далечниот запад, а бранот на циркулацијата на Росби поттикнува нов гребен кон исток.

Прогнозата за температурата за истиот период покажува надпросечни вредности на далечниот север, исток и запад од Европа, додека значително постуден воздух се очекува над централните и јужно-централните области. Се очекува и студен фронт да помине над Обединетото Кралство.

Прогнозата за врнежи укажува на повеќе врнежи над северот на Обединетото Кралство и делови од Скандинавија, поврзани со преминувањето на студен фронт. Друга дождлива област се формира околу Алпите, каде што влијанието на системот со низок притисок ќе предизвика пообилни врнежи.

Другиот дел од Европа останува посув, особено на запад и кон исток.

Значително повисоки температури во втората недела од август

Воздушниот притисок во втората недела од август сè уште покажува област со низок притисок над северозапад, која се протега кон исток. Сепак, прогнозата покажува дека во исто време над континентот се зголемува нов висок притисок, што ќе донесе зголемување на температурите.

Петдневната прогноза за температурата покажува ширење на свеж воздух над Велика Британија, Ирска, Скандинавија и делови од северна Европа. Сепак, седумдневната просечна температура покажува и пораст над централна Европа.

Пример за еднодневна прогноза за следниот петок покажува значително потопли температури над централна Европа, под влијание на растечкиот гребен. Пониските температури ќе останат над Велика Британија, Ирска, северот и делови од југоисточна Европа.

Врнежите ќе бидат ретки во втората половина од неделата. Суви услови ќе доминираат во поголемиот дел од континентот поради ширењето на антициклонот. Дожд се очекува само на далечниот север, каде што системите со низок притисок сè уште ќе циркулираат.

„Класичен пример за топлинска купола“

Ново зголемување на високиот притисок се предвидува над Западна Европа во третата недела од август, со истовремена област со низок притисок над север и исток. Ова значи продолжување на топлото време над Западна и Централна Европа, а затоплувањето би можело да ја зафати и Велика Британија.

Северот и североистокот ќе останат малку постудени, но сè уште е прерано да се прават сигурни предвидувања за можното продирање на ладен воздух кон југ.

Најголемиот дел од врнежите ќе останат далеку на север и североисток, додека подпросечните врнежи се очекуваат над остатокот од континентот.

Ова е класичен модел на таканаречени топлински куполи, кои ги интензивираат и го продолжуваат времетраењето на топлинските бранови.

Крајот на август носи топло време

Последната недела од август носи одредени промени – области со низок воздушен притисок се концентрирани на север и североисток, што би можело да отвори простор за спуштање на постуден воздух кон централна Европа. Сепак, високиот притисок ќе остане над запад, што значи продолжување на топлото време во таа област.

Прогнозата за температурата сè уште покажува изразен топлински сигнал над поголемиот дел од Европа. Единствен исклучок останува северот, под влијание на постуден воздух и облаци.

Прогнозите за врнежи не покажуваат никакви значајни промени – сè уште се очекува посуво време на речиси целиот континент, освен на далечниот север. Упорноста на високиот притисок го оневозможува развојот на системи што носат дожд.

Заклучок: Се движиме кон нов топлотен бран во втората половина на август

Целокупната слика за август покажува јасен тренд кон нов топлотен бран во втората половина на месецот, кој ќе ја погоди западна и централна Европа. Поголемиот дел од континентот ќе се соочи со подпросечни врнежи и понатамошни суви услови.

Иако ова се долгорочни прогнози кои се предмет на промена, тие се прилично сигурен показател за главните временски трендови до крајот на летото, заклучува Severe Weather Europe.