Силите на НАТО пресретнале иранска ракета насочена кон Турција

Анкара – Балистичка ракета лансирана од Иран насочена кон турскиот воздушен простор е пресретната од силите на НАТО, соопшти денеска Министерството за одбрана на Турција.

Како што се наведува, балистичката муниција истрелана од Иран е неутрализирана со помош на противвоздушната и ракетната одбрана на НАТО распоредена во Источниот Медитеран, пренесува Анадолија.

Остатоците од пресретнувачката ракета паднале во округот Дортјол во покраината Хатај откако заканата била уништена во воздух.

Потврдено е дека остатоците припаѓаат на одбранбена ракета, а не на дојдовна ракета. 

Според извештаите на Шафак њуз и Норт прес агенцијата, иранска балистичка ракета била пресретната над Камишли во североисточна Сирија, во близина на турската граница.

Во соопштението се додава дека во инцидентот нема жртви или повредени, како и дека Турција го задржува правото да одговори на какви било непријателски дејствија против неа, со предупредување до сите страни да се воздржат од чекори што би можеле да доведат до ескалација на конфликтот.