Шведска иновација на Моден викенд Скопје: Како од брзата мода да стигнеме до вечната мода (фото)
„Треба да преминеме од опседнатост со „облеката на денот“ во опсесија со облека што ќе трае цел живот”- истакна заменик амбасадорката на Шведска Елизабет Далберј Фрис, синоќа, на отворањето на изложбата
Моден Викенд Скопје, синоќа, пред многубројна публика , претставници на дипломатскиот кор и личности од јавниот живот, блесна во модна еуфорија, додека ја отвори својата 29-та сезона со креативен прв ден, полн со иновации и уметност. Под светлата на Културниот Центар Лабораториум, настанот започна во духот на одржливоста и културната револуција што го дефинира овој уникатен моден настан кај нас и во регионот, под будното око на Света Богова- Јовановска.
Првиот ден од Моден Викенд Скопје 2024 започна со силна порака – модата не е тренд, туку моќна алатка за промена. Во срцето на Скопје, Културниот Центар Лабораториум се претвори во креативна сцена каде локалната традиција и глобалните иновации се сретнаа за да го отворат патот кон иднината на модата. Оваа 29-та сезона не е замислена само како прослава на модната естетика, туку и на одржливоста како клучна компонента за трансформација на индустријата. Секоја изложба и секој дизајн беа дел од внимателно куриран дијалог за тоа како модата може да биде еколошки свесна и културно релевантна.
Најпрво, публиката имаше привилегија да ја посети изложбата „Fashion. Forever.“, курирана од Амбасадата на Шведска. Оваа изложба не беше само визуелен спектакл, туку и еден вид на повик за размислување – за тоа како модната индустрија може да ги прегрне принципите на циркуларната економија. Приказните за иновации и еколошка свесност се испреплетуваа во секој изложен експонат, додека младите дизајнери од цела Македонија ги покажаа своите решенија за иднината на модата.
“Изложбата го истакнува шведското искуство во поттикнување на иновациите, претприемништвото и индустриите кои поддржуваат и овозможуваат зелена транзиција во модната и текстилната индустрија. Се движиме подалеку од брзата мода кон нешто што трае – кон вечнa мода. Додека индустријата има голема улога – како потрошувачи, ние исто така треба да направиме промена. Треба да преминеме од опседнатост со „облеката на денот“ во опсесија со облека што ќе трае цел живот”- истакна заменик амбасадорката на Шведска Елизабет Далберј Фрис, синоќа, на отворањето на изложбата.
Во текот на вечерта, Џон Бела ја размрда атмосферата со својот музички настап, носејќи софистициран звук што ја освои публиката и ги постави основите за следните уметнички моменти. Но, токму изложбата „MASKAS“ го привлече вниманието како врвна уметничка симбиоза меѓу македонскиот тим Warm Metal и британскиот креативец Хуго Виндер-Линд. Оваа колаборација, поддржана од Британскиот совет, покажа како уметноста може да биде авангардна, но истовремено и естетски допадлива, препознавајќи ги традициите, но поставувајќи ги во модерен контекст.
На отворањето на оваа изложба присутните ги поздрави Клер Сирс, директорка на Британскиот совет за Западен Балкан.
Кулминацијата на вечерта се случи со модната ревија на DMWC „Во ритамот на македонските традиционални занаети и креации“. Иницијативата е дел од проектот „Промовирање на женската иновација и креативност на пазарот“, спроведена со поддршка на Амбасадата на Република Словенија.
Моделите ги носеа познати јавни личности од јавниот живот. Ова не беше обична ревија – тоа беше патување низ времето, од корените на македонските традиции до денешната креативна сцена, под менторската палка на реномираната дизајнерка Ирина Тошева.
Л. Сабит, Фото: Моден викенд Скопје
