Шпанското обвинителство бара 4 години и 9 месеци затвор за Карло Анчелоти за финансиска измама

Мадрид –  Шпанското обвинителство побара четири години и девет месеци затвор за тренерот на Реал Мадрид, Карло Анчелоти, кој е обвинет дека затаил повеќе од еден милион евра од шпанските даночни власти.

Адвокатот на тренерот, Карлос Сабала рече дека случајот е „јавно понижување“. Италијанецот (65) е обвинет за затајување данок за време на неговиот прв период во Реал помеѓу 2013 и 2015 година.

Обвинителот во случајот тврди дека се докажани намерите за „измама, прикривање и пропуштање информации“.

Адвокатот Сабала тврди дека Реал Мадрид бил причина за „договорна конфузија“ со барањето да се исплати дел од платата на тренерот во форма на авторски хонорари за да има корист од „поповолните даночни услови“.

-Господинот Анчелоти не разбрал што точно потпишува, увери тој.

За време на неговото сослушување во средата, самиот Карло Анчелоти рече дека „никогаш немал намера да изневерува“ и „не сфатил дека прави нешто лошо“. Тој додаде дека сите играчи го прават тоа, како и неговиот претходник во Реал, Жозе Мурињо. Португалскиот тренер беше осуден на една година условна затворска казна и парична казна од речиси 2 милиони евра откако се изјасни за виновен во 2019 година.