Шпанија тестира скратена работна недела со иста плата

Шпанија тестира скратена работна недела со еднаква плата како дел од мал пилот проект, објави државната телевизија RTVE, цитирајќи го Министерството за индустрија.

Доколку резултатите од пробниот период, кој првично ќе трае две години, бидат позитивни, мерката може да се прошири и на други делови од пазарот на трудот.

Вкупно 10 милиони евра се достапни за проектот кој вчера беше објавен во Службен весник.

Во проектот може да учествуваат мали и средни претпријатија, со најмногу 249 вработени во производниот сектор. Државата ќе им плати најмногу 150.000 евра доколку го намалат неделното работно време за најмалку 10 отсто за 25 до 30 отсто од вработените, во зависност од големината на компанијата.

Компаниите-учеснички мора да покажат и внатрешни организациски подобрувања во првата година од пробниот период, со цел да се подобри продуктивноста и да се компензира за повисоките плати по одработен час.

Компаниите можат слободно да одлучат дали ќе го намалат дневното работно време или ќе воведат четиридневна работна недела.