Сесии и трибини: Промоција на Скопје 2028- кандидат за Европска престолнина на културата

Тимот на СКОПЈЕ 2028 во соработка со градот Скопје и фондацијата „Марсел Хиктер“ од Брисел од денес почнува со реализација на серија на активности за трансфер на знаење, добри практики и вмрежување во полето на културата и развој на кандидатурата на градот Скопје за Европска престолнина на културата. Нивната организација е дел од програмата за меѓународна соработка на тимот на СКОПЈЕ 2028 и градот Скопје, како партнери во реализација на резиденцијалната сесија на „Европската диплома по културен проектен менаџмент” која ќе се одржи во нашата земја од 27 август до 5 септември.

Програмата во Скопје ќе се имплементира во 8 работни дена во соработка со културните институции Музеј на град Скопје, Дом на културата Кочо Рацин, Младински културен центар и Музеј на современа уметност, како и со активно учество на домашни претставници на културниот сектор и меѓународни културни оператори. Работните сесии ќе ги водат признати ментори и професори во полето на културните политики, менаџментот во култура, културното планирање, интеркултуралноста, развој на публика, креативен развој на градовите, меѓународна културна соработка и културните мрежи.

Меѓународните културни оператори во рамки на програмата ќе имаат можност да реализираат и дводневен работен престој во Струга, организиран во партнерство со Струшките вечери на поезијата.

 Програмата за меѓународна соработка ќе опфати неколку програмски модули:

Јакнење на капацитети, трансфер на знаења и примери на добри пракси во подготовка, имплементација и евалуација на програма на Европски престолнини на културата. 

Овие сесии ќе бидат водени од двајца професори Франко Бианчини (Италија/Англија) и Џонатан Гудејкер (Англија), експерти во полето на културата со значаен ангажман и искуство во развој, водење и евалуација на програми на повеќе Европски престолнини на културата, меѓу кои: Корк 2005 (Ирска), Ливерпул 2008 (Англија), Матера 2019 (Италија), Голвеј 2020 (Ирска) и Риека 2020 (Хрватска).

Покрај работните сесии со членови на тимот на СКОПЈЕ 2028, програмата опфаќа и сеопфатна работна сесија со членовите на Координативното Тело „Скопје 2028 – кандидат за Европска престолнина на културата” (составено од претставници на Владата, Министерството за култура, Град Скопје, градски и национални културни институции и претставници на граѓанското општество) и други поканети професионалци од секторот култура и конвергентните дејности. Оваа сесија ќе се реализира во големата сала на Советот на град Скопје.

Предавања и работилници значајни за современиот развој на културата и уметноста, а оттаму и битни за кандидатурата на градот Скопје за Европска престолнина на културата

Овие предавања и работилници ќе се осврнат на темите: партнерства во проекти на културна соработка и културни мрежи; етички дилеми во светот на современата уметност како предизвици за уметниците, кураторите  и менаџерите во културата; урбани културни политики во контекст на глобализацијата и ковид-19 пандемијата; интеркултурно учество во контекст на локални културни политики и социјална/етничка разновидност итн. Тие ќе бидат водени од Жан Пјер Деру (Белгија), Милена Драгичевиќ Шешиќ (Србија) и Франко Бианчини (Италија/Англија). Предавањата и работилниците се од затворен карактер за тимот на СКОПЈЕ 2028, поканети професионалци од локалниот културен сектор и 10те меѓународни културни оператори, учесници на Европската диплома, кои доаѓаат од 10 земји во светот. Освен пренос на знаење, овие хибридни сесии ќе создадат и  простор за креативна размена помеѓу домашни и странски културни оператори.

 Активности за вмрежување и запознавање со работата на локални културни институции, организации и професионалци од културата

Овој тип на активности ќе опфати организирани посети за меѓународните учесници на  три активни локални културни институции, организации и иницијативи (МКЦ, Кино Култура и Лоје/Тетово), културна тура низ градот Скопје и посети со водич низ поставките на Музејот на Град Скопје и Музејот на современа уметност. Дополнително ќе се реализира посебна средба за вмрежување помеѓу активни претставници на културниот сектор од Скопје и меѓународните учесници, која во неформален стил ќе има за цел да креира простор за запознавање и размена која ќе води кон развој на идни меѓународни партнерства во културни проекти.

Трибина за локалните културни политики на град Скопје, активности, стратегија за култура и меѓународна соработка

Трибината ќе обедини излагања од страна на висок претставник на градот Скопје, Роберт Алаѓозовски-национален координатор за интеркултурализам, едно општество, развој на културата и меѓуресорска соработка, Виолета Качакова-програмска менаџерка на СКОПЈЕ 2028, Филип Јовановски-претставник на граѓанското општество и член на тимот кој работи на изработка на долгорочната стратегија за култура на Град Скопје 2021-2030, како и учество на претставници на неколку локални културни институции.

Програмата за меѓународна соработка официјално ќе се отвори во пациото на Музејот на град Скопје в сабота (28 август) со обраќање до учесниците и партнери на програмата од страна на Никола Наумовски, шеф на кабинетот на градоначалникот на град Скопје.