Сега и Агенцијата за млади и спорт ја презема организацијата на Охридскиот маратон

Агенцијата за млади и спорт соопшти дека со владина поддршка ја презема организацијата на Охридскиот маратон. Откако претседателот Стево Пендаровски објави дека маратонот нема да се одржи бидејќи била блокирана сметката на Пливачката федерација на Македонија, почна политичката трка кој ќе застане зад традиционалната манифестација.   

 

„Годинава е 60 годишниот јубилеј на Охридскиот маратон. Како традиција, која Охрид и државата ги става во центарот на светската спортска мапа, Агенцијата за млади и спорт, заедно со Владата и сите надлежни институции, нема да дозволат овој познат, реномиран и светски признаен пливачки маратон да прекине и ќе ја преземе  организацијата за одржување на маратонот. И годинава, Охридскиот маратон во водите на Охридското езеро ќе ги пречека сите пријавени учесници и ќе продолжи да биде атракција како за вљубениците во спортот, така и за граѓаните на Охрид и за сите туристи кои наменски доаѓаат токму за да го проследат овој голем спортски настан“, стои во соопштението од Агенцијата. 

 

Овој спорт едно пет години пливаше во немирни и нејасни води со две паралелни федерации – eдната под името Пливачка федерација на Македонија во која прв човек беше Александар Маленко, а другата а Национална пливачка федерација. Маленко тврдеше дека валидна институација е само таа тој што ја води со тврдење дека е признаена од ФИНА (Светска пливачка федерација), а неговите противници се повикуваа на тоа дека е нивната е пријавена во централен регистар, па се препукуваа преку медиуми.

Маленко, кој живее во Словенија, се јави со долга реакција преку социјалните мрежи.  Тој вели дека додека маратонот го организирал во негов мандат, не добил ни денар од држата и претседателот и објаснува дека од оваа година има ново правило.

 „Одекна во јавност, нормално за кај нас со непроверени информации, како е ред во светот на олимписки спорт дека оваа година НЕМА да се одржи традиционалниот меѓународен Охридски пливачки маратон -Св.Наум -Охрид 25км !? Па следеа разноразни изјави од некомпетентни личности и разноразни политичари и политички чиновници од политички партии – НЕБИТНИ во светот на Олимписки спорт…   Е сега вака, ќе одиме со ред (кратко и јасно) а документирано до запирка исклучиво на СУД (согласно закон и ред) во Македонија.

Македонија со одлука на Влада од 1993 година како национален интерес го финансира Меѓународен охридски пливачки маратон како дел од ФИНА светска серија за секоја календарска натпреварувачка сезона и  генерален покровител е институција Претседател на држава.  До 2018 година државата преку институции Агенција за млади и спорт (годишна програма на пливачка федерација за меѓународни активности и манифестации од национален интерес) добивала 1.200.000 денари за организација, а награден фонд беше обезбедуван од „Телеком“  дивиденда и генерален покровител – претседател на Држава – 20.000 долари!!!   Од 2018 година до 2021 година  беа организирани три меѓународни традиционално Охридски пливачки маратони во ФИНА светска серија – 25км (2018, 2019, 2021г) како и Олимписка Дисциплина ФИНА-светска серија и ЛЕН европски куп (2018, 2019, 2021г) и ФИНА супер финале 2021 година – 10 километри. За волја на вистината, еден денар – ЕДЕН ДЕНАР, ДОЛАР, ЕВРО НЕ СЕ ИСПЛАТЕНИ ниту од ДРЖАВА ниту од генерален покровител – претседателот на државата за 2018, 2019, 2021 година на Пливачка федерација, а добиени се највисоки награди во историја на олимписки спорт и Македонија за техничка организација од ФИНА – 9 плакети и Лен – 3 плакети на технички организатор Пливачка федерација и нејзино раководство период 2018-2021 година!!!  За волја на вистината, постојат видео и аудио материјали, постојат фотографии од дотичните претседатели на држава и нивни помошници, директори на Агенција за млади и спорт период 2018-2021 година кои присуствувале на доделување награди (без НИКАКОВ ФИНАНСИСКИ УДЕЛ ОБЛИГАТОРЕН ПО ЗАКОН). 

За крај, најмалку е битно кој е раководство во федерација, туку битно е господа политичари и ваши полтрони во спортот да разберете дека со олимписки спорт и федерација не се игра, а најмалку се замајува јавност преку медиуми и ваши медиумски грачала за ефтини политички поени пред граѓани со лажни резултати и селски приредби кои си ги правите редовно со перење на државни и локални буџети за ваш личен интерес, а во реалноста – ДНО ДНА!!!  

Од 2022 година ФИНА одлучи дека нема повеќе во светот никаде, светска серија на 25 километри маратони под ФИНА, а секоја држава и федерација може да си организира локална или било каква спортска пливачка манифестација без никаква официјална резултатска вредност!!! Постои олимписка дисциплина – 10км далечинско пливање која е во официјална светска серија ФИНА и ЛЕН Европски куп – 10 км олимписка дисциплина. Бујрум, направете ако Ве бива официјален пливачки маратон, НИКОЈ НЕ ВЕ СПРЕЧУВА, ама за официјален да ви биде во Европа и светот, ќе треба да аплицирате за четиригодишен договор однапред, онака како што Јас ставив потпис и спроведов докрај заедно со мој професионален тим, БЕЗ ВИЕ ДА ДАДЕТЕ ДЕНАР КАКО Е ПО ЗАКОН И ПРОГРАМА ОБЛИГАТОРНО, ама затоа сте на суд (до последен со име и презиме) и досега за сите клевети, лаги кон мене лично и неисплатени финансии од ваша страна – 30.000.000 ден за пет години, имате две правосилни неспроведени пресуди и ве чекаат во септември уште минимум две!!! Ама Господ е еден и тој заедно со мене ќе Ви суди и во Лозана (Спортски арбитражен суд-ЦАС) а од таму нема бегање од пресуда и исплата до последен денар!- порачува Маленко.