Се апси по вторпат за „Илирида“, МВР и Обвинителството во акција

Секторот за внатрешни работи – Скопје во координација со Основното јавно обвинителство – Скопје постапуваат по вчерашните националистичките скандирања на натпреварот Шкендија-Карабах на Националната арена „Тодор Проески“. Од преносот на натпреварот може да се слушне дека се извикува „Илирида“, додека дел од медиумите јавуваат дека се скандирало и „Голема Албанија“.

За помалку упатените, Илирида е името на политички концепт на дел од Албанците во Македонија кој подразбира формирање независна република на територијата на западниот дел од земјата. Разбирливо, државата на концептот гледа како на иредентистички, сецесионистички и како на обид да се поттикне меѓуетничка нетрпеливост.

Извикувањето „Илирида“ најдобро може да се слушне почнувајќи од 59. минутата на натпреварот. Од снимката не се гледа, но од тонот се чини дека навивачите на Шкендија го почнуваат скандирањето, а остатокот од стадионот ги повторува зборовите.

Ова е втор случај за обвинителите и полицијата, по инцидентот во Куманово, за кој тамошното обвинителство поведе постапка по антиалбански скандирања, каде што на кошаркарски меч на Илинден, од трибините се извикуваше „Чиста Македонија“.

За настанот во Куманово, Обвинителството ги побара снимките од видео надзорот, а полицијата веќе уапси едно лице што се обидело да внесе транспарент со навредлива содржина. Инцидентот се повтори вчера, иако полицијата најави ригорозни казни за сите што од спортските трибини ќе шират навреди или нетрпеливост

МВР подоцна излезе и со соопштение во кое стои:

„Министерството за внатрешни работи во континуитет апелира до сите граѓани и членови на навивачки групи да ги бодрат своите спортски клубови, но да навиваат спортски, исклучиво во спортски дух, без говор на омраза, без било какви навреди по лична, етничка, верска или било која друга припадност што не соодветствува на спортски натпревари и е спротивно на законот.

Во тој контекст, МВР уште еднаш нагласува дека во рамки на обезбедувањето на мирни и непречени спортски натпревари, како во минатото така и сега и во иднина, полицијата ќе биде крајно ригорозно по однос на било какви нарушувања на јавниот ред и мир, односно било какви навредливи скандирања и друг начин на ширење на говор на омраза.

За потсетување, во врска со кошаркарскиот натпревар што се одржа на 2.8.2025 во Спортската сала во Куманово, во СВР Куманово веќе се повикани неколку осомничени лица со кои што е извршен службен разговор, и по извршени анализи во координација со ОЈО Куманово ќе бидат преземени конкретни законски мерки  а едно лице е лишено од слобода и против него ќе следи соодветен поднесок.       

Што се однесува за фудбалскиот натпревар кој се одржа на арената Тодор Проески во Скопје на 5.8.2025, СВР Скопје врз основа на снимениот и документиран материјал презема мерки во координација со надлежен јавен обвинител. Имено, доставено е писмено известување до Обвинителството врз основа на веќе утврдениот материјал, по што МВР ќе постапува согласно своите надлежности во координација со ОЈО и за било какви утврдени законски прекршувања ќе следуваат соодветни поднесоци, за што јавноста благовремено ќе биде информирана“.