СДСМ за индексот на „Економист“: Пофалби за изборите, минуси за политичката култура и лажните вести
![](https://nezavisen.mk/wp-content/uploads/2021/02/економист.jpg)
СДСМ реагира на новиот индекс на демократија на „Економист“ во кој земјата и натаму е вброена во хибридни режими. Според владеечката партија, „Економист“ ги пофалил изборите, но поради недостигот на политичка култура во земјата бележиме минуси.
-Индексот на демократија на „Економист“ нотира пофалби за Република Северна Македонија како успешен пример поради начинот на кој беа организирани и спроведени изборите, што е значаен успех имајќи ги предвид специфичните околности и предизвици за организирање успешен изборен процес во време на пандемија и здравствена криза.
Две години по ред државата бележеше напредок на Индексот откако претходно 10 години по ред вртоглаво паѓаше, а за 2020 се воочени благи негативни моменти кои се должат на две причини, односно поради рестрикциите кои секако беа неопходни во време на пандемија и здравствена криза, како и поради недостиг на напредок во политичката култура, што главно се должи на лажни вести, на политички радикализам, самовластие и неказнивост за кои што има и јавно познати виновници.
Работата на државните институции во време на пандемија, но и однесувањето на опозицијата и нивните кадри во преодната влада, однесувањето на лидерот на ВМРО-ДПМНЕ се исто така дел од Индексот на демократија на „Економист“.
Свежи се сеќавањата како се однесуваа членовите на преодната Влада од редовите на ВМРО-ДПМНЕ, како се однесуваа Наќе Чулев и Христијан Мицкоски во однос на прекршување на бројните мерки и задолженија, како и нивна неказнивост.
По подолг период, во 2018 и 2019 година, рангирањето на Северна Македонија на Индексот на демократија на „Економист“ беше подобрено, откако минавме 10 години во стагнација и пад, кога бевме квалификувани како „хибриден режим“. За потсетување, најдобиот резултат на нашата држава беше забележан во 2006 година, пред да се инсталира режимот кога резултатот беше 6.33 индексни поени, стои во реакцијата на СДСМ.