СДСМ Прилеп: На два месеца пред одржувањето на „Војдан Чернодрински“ – Прилеп без театарски сали

По одлуката да се затвори објектот на театарот во Прилеп, поради небезбедни услови за работа, иста одлука имаше и за киното и салата во Центарот за култура „Марко Цепенков“, а денеска од СДСМ реагираат дека за тоа виновен е „срамниот однос на ВМРО-ДПМНЕ кон прилепчани“.

– Прилеп, градот на културата и на театарската уметност кој изнедрил десетици уметници, актери, режисери, драмски автори и театарски работници чии имиња се изговараат стоечкум и со должен пиетет, го допре дното. Инспекторите на Дирекцијата за заштита и спасување ги затворија Народниот театар „Војдан Чернодрински“ и големата сала на Центарот за култура „Марко Цепенков“, а катанци доби и киното „Мис Стон“. Тоа е резултатот од негрижата и четиригодишното срамно менаџирање на културата од страна на локалната власт на ВМРО-ДПМНЕ – рече Кети Стевананџија од СДСм Прилеп.

Според нив, срамот е уште поголем, затоа што и театарот и салата во Центарот за култура се затворени заради, како што констатирала инспекцијата, опасност по безбедноста на уметниците и посетителите во двете институции.

За ваквата ситуација ја најдоа виновна и Владата на ДПМНЕ, која ветуваше изградба на нов театар во градот под Марковите Кули.

– Имено, иако проектот за новата театарска зграда од поодамна е готов, тој не се најде во Програмата на Владата за изградба на нови и реконструкција, санација и адаптација на постоечките објекти од областа на културата за 2025 година. Ова е “подарокот“ со кој локалната и централната власт на ДПМНЕ на прилепскиот театар му ја честитаа 75-годишнината од неговото постоење. Период во кој на „штиците што живот значат“ биле одиграни над 7.000 претстави, кои ги виделе близу 2 милиони гледачи – вели Стевананџија.

Скандалот во режија на ДПМНЕ уште повеќе добива на тежина, ако се знае дека сето ова се случува на само два месеца пред почетокот на 59-тото издание на Македонскиот театарски фестивал „Војдан Чернодрински“.

За да не се доведе во прашање одржувањето на престижниот и етаблиран театарски фестивал, апелираат до градоначалникот Борче Јовчески и до Владата на ДПМНЕ, да ги ангажираат сите расположливи ресурси, да ги издвојат потребните финансиски средства и да овозможат услови за продолжување на шестдецениската традиција на „Војдан Чернодрински“.