СДСМ поднесе иницијатива до Уставен суд за Законот за внатрешни работи

 Обвинувајќи дека се случува „брутална партизација“ на Министерството за внатрешни работи СДСМ поднесе иницијатива до Уставниот суд за Законот за внатрешни работи.

„Додека криминалот и корупцијата царуваат насекаде, скандали со 5 тони дрога кои водат до врвот на власта, во МВР се случува операција за отстранување на неподобните професионалци и ставање партиски послушници.

Со новиот Закон за внатрешни работи, кој го донесоа и го менуваа неколку пати за само една година, ВМРО-ОКГ и Панче Тошковски ги деградираат професионалците и инсталираат партиска војска во полицијата. Тошковски прераспоредува полициски службеници ‘по потреба на службата’, без никакви критериуми и без согласност на вработените“, изјави генералниот секретар на партијата Александар Димитриевиќ пред Уставниот суд.

СДСМ тврди дека Тошковски удира и по џебот на полицајците и дека работното искуство веќе не бил дел од основната плата. „Го укинува загарантираниот додаток за овластување од 20% и 30%, а наместо тоа, Тошковски носи класифицирани листи за тоа кој заслужува додаток на плата.

Значи платата на полицаецот повеќе не зависи од неговиот труд и закон, туку од желбата на Панче Тошковски.

Денеска поднесуваме иницијатива до Уставниот суд за оценување на уставноста на овој скандалозен Закон за внатрешни работи.

Бараме итно поништување на спорните одредби и стопирање на сите незаконски прераспоредувања и постапки на Тошковски кои се донесени врз основа на овој Закон“, рече Димитриевиќ.