Руски регион ѝ забрани на Комунистичката партија да го користи Ленин во кампања- бидејќи е мртов

Руската комунистичка партија (КПРФ) препечати 20.000 предизборни материјали во Тјуменскиот регион откако официјалните лица се спротивставија на фотографијата на Владимир Ленин.

Приговорот се фокусираше на споменикот на Ленин подигнат во Тоболск во 2024 година со финансирање на КПРФ. На предизборните материјали им е забрането да прикажуваат слики од починати лица од мај 2026 година, и ова се чини дека е прв случај во кој забраната е спроведена во пракса, според рускиот бизнис дневен весник Комерсант.

Николај Шадрин, член на регионалната изборна комисија, ги извести комунистите за приговорот, а КПРФ ги препечати материјалите  без фотографијата од споменикот.

Тјуменската регионална изборна комисија изјави дека официјално не добила никакви макеријали од партијата со слика од споменикот на Ленин, но потврди дека објавувањето на материјалот би ги прекршило новите барања според законот за водење кампања.

„Сликата на починати лица во која било форма, без разлика дали е споменик или слика, не може законски да се постави на материјали за кампања“, додаде комисијата.

Русија ќе одржи избори на различни нивоа на 20 септември 2026 година, вклучително и избори за пратеници на Државната дума. Единствена Русија го обезбеди првото место на гласачкото ливче за изборите за Државната дума, како и на гласачките ливчиња во 21 од 39 региони за регионални парламентарни избори (што е речиси статистички невозможно со случајно извлекување). Партијата Јаблоко го имаше второто место на гласачкото ливче за Државната дума, но Врховниот суд ја отстрани партијата од трката.