Руски пратеници бараат Путин да биде обвинет за велепредавство

Седум пратеници во вториот по големина град во Русија, Санкт Петербург, беа повикани од полицијата откако побараа од Долниот дом на парламентот, Државната Дума, да го обвини претседателот Владимир Путин за велепредавство поради неговата одлука да започне неиспровоцирана инвазија на Украина.

Седумте пратеници од општинскиот округ Смолни во Санкт Петербург доцна на 8 септември добија покани преку СМС со наредба да дојдат во полициската станица следниот ден за да пополнат протоколи за обвинение за дискредитација на руските вооружени сили.

На 7 септември групата испрати официјално писмо до Државната дума барајќи од федералните пратеници да иницираат соборување на Путин бидејќи, според нив, тековната војна ја оштетила безбедноста на Русија. Во писмото, исто така, се вели дека инвазијата довела до смрт на руски војници, ја оштетила економијата и економските услови за граѓаните на земјата, донела проширување на НАТО во Шведска и Финска и ја милитаризирала Украина преку помошта на други држави. Писмото е испратено до рускиот Совет за безбедност и до лидерите на пет политички фракции во Државната дума.

На почетокот на март, Путин потпиша закон со кој се предвидуваат долги затворски казни за дистрибуција на „намерно лажни информации“ за руските воени операции додека Кремљ се обидува да го контролира наративот за неговата војна во Украина започната кон крајот на февруари. Тој, исто така, го направи незаконско „упатувањето повици против употребата на руските трупи за заштита на интересите на Русија“ или „за дискредитација на таквата употреба“ со можна казна до три години затвор. Истата одредба важи и за барањето санкции против Русија.