Руската офанзива во Донбас го достигна врвот без позначајни резултати

Широко најавуваната офанзива на руската армија во Украина, која се очекуваше да напредува во Донбас, се приближува до врвната точка без да донесе значајни резултати за Кремљ, пишуваат експертите од Американскиот институт за проучување на војната (ИСВ).

„Пролетната офанзива на руските трупи веројатно се приближува до својата кулминација. Тековните руски офанзиви долж линијата Сватово-Кремена, околу Бахмут и на фронтот Авдиивка-Донецк и Вухледар не успеаја да донесат повеќе од помали тактички успеси“, се вели во дневниот извештај на ИСВ.

Полковникот на вооружените сили на Украина Олексеј Дмитрашковски, шеф на заедничкиот прес-центар на одбранбените сили од насоката Таврија, на 19 март посочи дека руските сили енергично ја напаѓаат Авдиивка, обидувајќи се да ја рестартираат офанзивата во регионот Вухледар. Нивните акции резултираа со значителни загуби кои во голема мера ја намалуваат офанзивната способност на Русија во регионот на Донецк. 155-та поморска пешадиска бригада веќе доживува сериозен недостиг на луѓе и опрема по неуспешните напади во регионот Вухледар во ноември 2022 година и февруари 2023 година, пишува ИСВ. Обидите итно да се компензираат загубите на некои единици на сметка на други сведочат за нивото на очај на руското воено раководство, сметаат експертите на институтот.

Истражувачите веруваат дека руската офанзива ќе заврши без разлика дали руската армија ќе го преземе Бахмут или не. Офанзивните операции на Москва во правците Купјанск, Сватово и Кремена во областа Луганск „исто така не носат значителен успех“.