Ричард Гир од Шпанија предупреди за „силеџијата“ Трамп и „кловновите милионери“ околу него

Гранада – Филмската ѕвезда Ричард Гир остро го критикуваше претседателот Доналд Трамп и предупреди на порастот на авторитаризмот на глобално ниво за време на доделувањето на наградите во Шпанија за време на викендот.

„Америка е на „многу темно место“ со „насилникот и силеџија“ Доналд Трамп како претседател“, рече Гир (75), при прифаќањето на трофејот за животно дело на шпанските награди Гоја во саботата.

Толпата навиваше.

Но Гир – кој минатата година објави дека се преселил во Шпанија, од каде што е неговата сопруга Алехандра Силва – рече дека проблемот не е ограничен само на неговата татковина.

„Ги има насекаде“, рече тој. „Насекаде“.

Гир рече дека прочитал „трогателно писмо“ во „Њујорк тајмс“ од писател од Унгарија кој предупредил на „лизгавата патека“.

„Авторитаризмот нè обзема насекаде“, рече тој. „Мораме да бидеме будни. Мора да бидеме енергични. Мора да бидеме храбри. И секој што го гледа ова – во светот што зборува шпански и на други места – треба да бидеме подготвени да станеме, да ја кажеме вистината, да бидеме искрени. И во сите наши животи има место за основна добрина, за основна љубов и разбирање“.

Variety забележа дека Гир даде слични коментари на прес-конференција во петокот, каде што предупреди дека „мрачниот брак на пари и моќ“ во Соединетите држави е опасност за целата планета.

„Кловновите милионери кои го опкружуваат Трамп се незрели и нарцисоидни, смртоносна мешавина“, рече тој.