Реакција на Владата: Одлуката на Бугарија е неуспех за ЕУ, за идентитетот и јазикот нема преговори

Според владини извори, македонскиот идентитет и македонскиот јазик не се предмет на преговори, а преговорите со ЕУ не смеат да се претворат во преговори со Бугарија

Блокадата на Бугарија за утврдување на преговарачката рамка за Македонија е неуспех за политиката на ЕУ за проширувањето, лоша порака за целиот регион и пораз за фундаменталните европски вредности и принципи, брифираат владини извори вечерва по денешното вето на Софија во ЕУ. Од Владата велат дека македонскиот идентитет и македонскиот јазик не можат да бидат предмет на преговори, но дека ќе продолжи барањето решение за европската иднина на македонија за која нема алтернатива.

„Задршката на Бугарија да ја одобри преговарачката рамка не е во духот на добрососедските односи. Ваквиот став на бугарската влада е спротивен на членот 2 од Договорот за пријателство од 2017.

Нашата позиција е јасна: ние сметаме дека европските интеграции не смеат да бидат заложник на билатерални прашања. Преговорите со ЕУ не смеат да се претворат во преговори со Бугарија. Нашиот напредок во ЕУ интеграциите првенствено треба да зависи од домашните реформи врзани со поглавјата, законодавството на ЕУ и постигнувањето на европските стандарди“ велат од Владата.

Оттаму уште нагласуваат: „Ние сме сигурни во тоа кои сме и што сме. Од секогаш сме биле Македонци коишто зборуваат македонски јазик, со силно чувство на самоопределување околу кое не може да се преговара и кое не може да биде доведено во прашање. Македонскиот идентитет и македонската национална свест биле отсекогаш високо изразени и на научно и на духовно ниво. Така е и денес, така ќе биде секогаш.

Но, истовремено сме особено горди и на нашата смиреност и на нашата национална и политичка големина во овој тежок период за нас. Тоа е одлика на вистински Европејци, тоа е одлика на Македонците“.

Од Владата велат дека Македонија и Бугарија се блиски држави, а македонскиот и бугарскиот народ отсекогаш биле исклучително блиски, сега и сојузници во НАТО, а тие односи треба уште повеќе да ги подобруваме, со взаемна почит и разбирање.

„Имаме заеднички геополитички интереси, за самите себеси, но и за регионот. Наш заеднички интерес е целиот балкански регион што побрзо да се интегрира целосно во ЕУ, да се поврземе инфраструктурно, преку Коридор 8, да овозможиме полесен проток на луѓе, идеи, стоки и капитал, да изградиме добри услови за бизнисот, да ги зголемиме инвестициите – тоа е вистински патриотизам и лидерство“, велат од Владата.

Владата му се заблагодарува на ангажманот на германското претседателсто со ЕУ и на личниот ангажман на канцеларката Ангела Меркел. Потоа, велат дека вложиле сериозни дипломатски напори да се создадат услови минатото да не биде кочничар на иднината. И дека ќе продолжат интензивните разговори во интерес на европската иднина на Македонија дека решение е можно само ако двете страни излезат како победници.

Владата посебно им се заблагодарува на сите граѓани од сите етнички заедници во државата и до сите политички претставници на различните заедници во земјата, за поддршката која се дава на македонскиот народ во овие моменти со цел заштита на македонскиот идентитет и за останувањето посветени на европскиот пат.

Владата уште вели дека останува на истиот стратешки колосек и по членството во НАТО  ќе продолжи со реформите со силен интензитет, затоа што за Македонија нема друг пат, нема друга алтернатива.

Најпосле, од Владата апелираат до „раководството на ВМРО-ДПМНЕ да престанат да се радуваат на тешките моменти во кои се наоѓа државата и да го препознаат моментот кога одредени национални прашања ги надминуваат границите на вообичаените партиски пресметки“ и дека „нема ни трошка вистина во манипулациите кои ги пласираат дел од опозициските партии предводени од ВМРО-ДПМНЕ, за наводно распродавање на македонскиот идентитет“.