Разговор со Владимир Јанковски во Градската библиотека во Скопје

Во Градската библиотека „Браќа Миладиновци“ во Скопје вечер ќе се одржи разговор со писателот и преведувач Владимир Јанковски, чиј роман „Ехото на акробатите“ е книга за месец април во сите библиотеки од мрежата на ГБСК.

Разговорот со Јанковски, книгата на месецот и клубот на читатели се дел од кампањата „Читаме современи македонски автори“ на Градската библиотека.

Модератор на разговорот ќе биде Александра Јуруковска, а фрагменти ќе чита актерот Андреј Серафимовски. Јанковски за оваа книга ја доби наградата „Пегаз“ за најдобар необјавен роман во 2024 година, признание што го доделува издавачката куќа Арс Ламина.

Владимир Јанковски е писател, уредник и преведувач. Завршил Општа и компаративна книжевност на Филолошкиот факултет „Блаже Конески“ во Скопје. Досега има објавено две книги разговори со Влада Урошевиќ („Огледало за загатката“ и „Кабинет на чуда со ѕидови од огледала“), книгите „Скопје со широко отворени очи (фотоесеј)“ и „Лицата на невидливиот град“, во соработка со фотографот Иван Блажев, и четири романи („Вечно сегашно време“, „Невидливи љубови“, „Скриени желби, немирни патувања“ и „Ехото на акробатите“).

Разговорот со Владимир Јанковски е дел од програмата Скопје 2028 – Европска престолнина на културата.