Путин се опушти и дава изјави како Русија да цвета во мир и напредок

Рускиот претседател Владимир Путин зборуваше на Источниот економски форум во Владивосток на пацифичкиот брег на Русија. Тој зборуваше за економијата, но овој негов настап ќе биде запаметен по изјавите и оценките за некои настани и личности главно поврзани со војната во Украина што ја започна во февруари 2022.

Еве некои од највепчатливите:

За заминувањето во странство на неговиот поранешен советник Анатолиј Чубаис

„Факт е дека Анатолиј Борисович поради некоја причина се крие таму… Ми покажаа некоја фотографија од Интернет, каде што тој веќе не е Анатолиј Борисович Чубаис, туку таму живее некој Моше Израилевич. Зошто го прави ова? Не разбирам. Зошто побегна? Можеби тоа се должи на фактот што таму се случуваат сложени процеси во структурата на нанотехнологијата, на која тој раководеше долги години. Таму (во Роснано) има голема дупка, огромна финансиска дупка. Големи бројки. Можеби се плачи од криминални случаи. Но, фала богу, таму нема никакви кривични предмети или обвиненија. Можеби ова се должи на фактот дека тој се плаши од криминални случаи, па илегално отиде во Израел. (се смее). Зошто му треба ова, не разбирам… Очигледно, неговите активности на чело на голема компанија создадена за развој на нанотехнологијата, барем од економска гледна точка, се чини дека не му успеале.

За основачот на „Јандекс“ Аркадиј Волож и неговата антивоена изјава

Путин го критикуваше Аркадиј Волож, коосновачот на рускиот технолошки гигант „Јандекс“, кој минатиот месец ја опиша инвазијата на Украина како варварска.

Путин рече дека Волож „е принуден да дава изјави за да го зачува својот странски бизнис и имот. Претходно, тој седеше немо. Бог да го благослови, тоа не ни пречи. Тој е талентиран човек, но треба да има чувство на морална совест и благодарност кон земјата што му даде сè“, рече Путин.

Волож има руски и израелски пасош и живее во Израел од 2014 година.

Волож стана еден од најистакнатите руски бизнисмени што ја критикуваше војната кога објави експлозивна изјава во август.

„Јас сум целосно против руската варварска инвазија на Украина, каде и јас, како и многумина, имам пријатели и роднини. Ужаснат сум од фактот што секој ден паѓаат бомби во домовите на Украинците“, рече тој.

„И покрај фактот што не живеам во Русија од 2014 година, разбирам дека и јас имам дел од одговорноста за постапките на земјата“, додаде тој. „Имаше многу причини зошто морав да молчам. Може да се расправате за навременоста на мојата изјава, но не и за нејзината суштина. Јас сум против војна“.

Волож поднесе оставка од функцијата извршен директор на „Јандекс“ во јуни 2022 година, откако беше санкциониран од Европската унија поради акциите на Русија во Украина.

За културните дејци кои заминаа од Русија

„Според различни проценки, истите тие новинари проценуваат дека приближно 160-170 [културни работници] заминале во странство; тие не се согласуваат со политиките на руската држава. Но, можете да не се согласувате и да бидете тука и да разговарате за тоа, никој не го забранува тоа. Но, некој избра да замине. Ова е поврзано не само со положбата на луѓето од областа на уметноста, тоа е поврзано и со материјалните работи. На крајот на краиштата, во последните години купија куќи, станови во странство, имаат сметки во странство. Луѓето сакаат да ги задржат, се плашат да не ги изгубат.

Ако замине некој талентиран човек кој можеше да направи нешто овде, веројатно нешто изгубивме. Но, од друга страна, искрено ќе кажам дека можеби би било подобро да го прави тоа што го прави во странство, на чии интереси сака да им служи, отколку да си игра со мозокот на милиони наши граѓани овде и да промовира некои неконвенционални вредности“.

Трамп е под „прогон како политички ривал“

Путин го опиша кривичното гонење со кое се соочи поранешниот американски претседател Доналд Трамп како политички прогон. Кривичните случаи против Трамп се „добри за нас“, бидејќи ја покажуваат „гнилиоста на американскиот систем, кој не може да се преправа иа ги учи другите за демократијата“.

„Сè што се случува со Трамп е прогон на политички ривал од политички причини. И тоа се прави пред јавноста на Соединетите Држави и пред целиот свет“, рече тој.

Путин додаде: „Тие едноставно ги изложија своите внатрешни проблеми и во оваа смисла, тоа е добро (за нас) затоа што покажува кој се бори против нас, ова го покажува, како што велеа уште во советско време, ѕверскиот изглед на американскиот империјализам“.

Трамп е првиот сегашен или поранешен претседател во историјата на САД кој се соочува со четири кривични пријави. Претседателските избори во САД најверојатно ќе имаат огромни импликации за војната во Украина.

Највисоки американски и европски претставници изразија загриженост дека Путин ги вбројува изборите во неговото воено планирање со надеж дека поразот на претседателот Џо Бајден следната година ќе ги натера САД да ја намалат поддршката за Украина и да ја подобрат преговарачката позиција на Русија.

Дури 270.000 Руси доброволно се пријавиле во вооружените сили

Повеќе од четвртина милион Руси доброволно им се приклучија на вооружените сили во последните месеци, изјави Владимир Путин. Одговарајќи на прашања Путин рече дека регрутирањето е дополнување на делумната мобилизација пред една година.

„Направивме делумна мобилизација и беа повикани 300.000 луѓе. Во изминатите шест или седум месеци имаме 270.000 луѓе кои доброволно потпишаа договори за услуги“, рече Путин.

„Луѓето доаѓаат во воените канцеларии за регистрација и упис и потпишуваат договори. Секој ден 1.000-1.500 луѓе склучуваат договори дневно“, додаде тој.

Путин нагласи дека оние што се пријавиле го направиле тоа доброволно, „сфаќајќи дека можат да бидат ранети и да ги дадат своите животи за татковината“.

Испраќањето тенкови во Унгарија и Чехословачка беше грешка

Путин изјави дека одлуката на Советскиот Сојуз да испрати тенкови во Унгарија и Чехословачка за да ги задушат масовните протести за време на Студената војна е грешка, објави Ројтерс.

„Тоа беше грешка“, рече Путин на прашањето за впечатокот дека Русија се смета за  колонијална сила поради одлуката на Москва да испрати тенкови во Будимпешта во 1956 година и во Прага во 1968 година.

„Не е во ред во надворешната политика да се прави нешто што им штети на интересите на другите држави“, рече Путин. Рускиот претседател испрати 150.000 војници во февруари 2022 да водат со ништо непредизвикана војна. Таа војна трае и денес проследена со огромни уништувања и човечки загуби. Путин рече дека САД ги прават истите грешки како Советскиот Сојуз. Тој додаде дека Вашингтон „нема пријатели, туку само интереси“.

Унгарското востание од 1956 година беше задушено од советски тенкови и трупи. Во борбите загинаа најмалку 2.600 Унгарци и 600 советски војници. Прашката пролет од 1968 година заврши кога силите на Варшавскиот пакт предводени од Советскиот Сојуз ја нападнаа Чехословачка. Според чешките историчари, во настаните загинале околу 137 Чеси и Словаци.