Публика
ЛЕЈЛА САБИТ
Секоја година, во полна или во празна сала, на концерт, на спортски, политички, бизнис или гала-настан.
Културна, безобразна, задоволна, разочарана, внимателна, невнимателна, се забавува, се досадува, ужива, негодува, седи или стои.
Малку ѝ е еден час, многу ѝ се два часа, тешко ѝ се доаѓа, а потоа тешко ѝ се оди.
Доаѓа од куртоазија, за почит, за мерак, за сеир, да ја видат и да види, да дознае, да озборува, да се дружи, да моли, да молчи или да се дотера.
Домашна или странска, ве иритира или ве нервира, некогаш е урбана, некогаш селска, некогаш достоинствена, а некогаш без достоинство.
Некогаш во тоалета, некогаш во тренирки, на висока потпетица или во патики, како што се чувствува, а не како што налага дрес-кодот.
Бара паркинг, бара превоз, се турка за билети, за влез или за излез.
Пред почетокот :
Доцни најмалку 15 минути.
Влегува кога ќе се изгаснат светлата.
Во темница си ги бара седиштата.
Ја станува публиката што дошла навреме.
Додека трае програмата или говорот:
Си прави гласно муабет.
Разговара или сурфа на мобилен телефон.
Разменува СМС-пораки.
Шушка со кеси или џвака мастика.
Ракоплеска каде што не треба.
Оди на пушење и во тоалет кога ќе ѝ дојде.
Пред крајот :
Не го дочекува културно крајот.
Станува во темница.
Ја станува публиката што останува до крајот.
Не е лесно да си домаќин или организатор во Македонија.
Секој втор е ВИП-гостин, секој сака покана или гага-влезници и во прв ред.
Желбата е пред заслугата, функцијата е пред знаењето.
Кој е точен е неточен, кој доцни е елита.
Во која група спаѓате вие?