Прогноза за 2022 година: Макрон ќе победи, Орбан ќе изгуби…

Марк Леонард и Џереми Шапиро од Европскиот совет за надворешни односи  предвидуваат десет можни политички настани за 2022 година. Нивните предвидувања се смели и излегуваат од рутинските прогнози за секоја година. Еве што предвидуваат тие:

1. Демократите ќе изгубат најмалку еден дом на американскиот Конгрес на среднорочните избори во ноември, а веројатно и двата. Овој развој на настаните ќе ја запре законодавната агенда на претседателот Џо Бајден, но, тоа нема да значи крај на неговото претседателствување (иако многу експерти ќе го предвидат тоа веднаш потоа). Како и многу претседатели пред него, Бајден ќе се сврти кон областите што може да ги контролира, особено надворешната политика, додека се противи на опструкционистичкиот Конгрес.

2. САД ќе започнат разговори со Русија за европскиот безбедносен поредок и нема да има  голема руска инвазија на Украина. Но, концентрациите на руските војници на границата со Украина и воената закана за земјата ќе опстојат. Ниту разговорите, ниту заканата нема да завршат во 2022 година.

3. Развиениот свет ќе научи да живее со Ковид-19. Вакцините и подобрените опции за третман значат дека Ковид-19 ќе престане да биде многу опасен по животот во развиениот свет, иако вирусот ќе остане присутен, па ќе стане и  вообичаен. Сепак, во многу земји во светот во развој кои немаат доволен пристап до вакцини и антивирусни лекови, Ковид-19 ќе продолжи да претставува значителен економски и здравствен предизвик.

4. Емануел Макрон ќе победи  на француските претседателски избори и ќе го користи својот нов мандат за да ја „обнови “ Европа. Победата на Макрон , според повеќето коментатори, во голема мера ќе биде резултат на недостатоците на неговите противници. Но, француските претседатели ретко се познати по нивната понизност. Макрон ќе ја следи оваа голема традиција, ќе бара мандат за промени и – во соработка со германскиот канцелар Олаф Шолц и италијанскиот премиер Марио Драги – ќе ја објави својата намера  „повторно да ја стартува“ Европската унија. Набљудувачите ќе се запрашаат што значи ова.

5. Унгарскиот премиер Виктор Орбан ќе ги изгуби изборите во Унгарија, но ќе тврди дека победил. Партијата Фидес  ќе ги загуби унгарските избори од новообединетата опозиција – или така ќе тврдат надворешни набљудувачи на изборите. Но, и покрај тоа, Орбан ќе ја следи игротеката на поранешниот американски претседател Доналд Трамп тврдејќи дека победи, па и  ќе ги подобри перформансите на Трамп со тоа што всушност ќе остане на власт. Ова ќе поттикне големи улични протести во Унгарија и криза меѓу Унгарија и ЕУ.

6. Нуклеарните разговори со Иран ќе продолжат, додека нуклеарната програма на земјата ќе  напредува. Разговорите со Иран за обновување на иранскиот нуклеарен договор нема да одведат  никаде во 2022 година. За да го задржи притисокот, Иран ќе продолжи со својот постојан напредок кон нуклеарно оружје, предизвикувајќи зголемени израелски закани, разни напори за саботажа и обновени стравувања од израелски или американски напад врз иранските нуклеарни постројки.

7. Фракција на авганистанските Талибанци ќе ја собори владата.Со оглед на тоа што Авганистан се наоѓа во масивна економска и хуманитарна криза, релативно либерална фракција на авганистанскитеТталибанци ќе ја собори централната влада.Лидерите на оваа фракција ќе прогласат прекин со претходната влада и ќе предложат попомирлива политика кон меѓународната заедница. Меѓународните донатори ќе одговорат со значително зголемена помош.

8. Емисиите на јаглерод во Кина ќе продолжат да растат брзо. Кинеската влада ќе истрае во својата реторика за справување со предизвикот на климатските промени, но нема да успее значително да го забави растот на емисиите на јаглерод во Кина. Пекинг ќе се обиде да ги прикрие методите за мерење на емисиите со ветувања дека ќе ги прави подобро. Бидејќи САД, Германија и многу други земји ќе ги пропуштат своите цели за намалување на јаглеродот,  нема да се жалат премногу гласно за Кина.

9. Протести против високите цени на енергијата и против Европскиот зелен договор ќе еруптираат  низ ЕУ. Недостигот на напредок во намалувањето на емисиите на јаглерод нема да ги спречи протестите против високите цени на енергијата и поврзаниот Европски зелен договор  низ поголемиот дел од ЕУ и Обединетото Кралство. Земјите-членки ќе одговорат со обвинувања против ЕУ и со лобирање во Брисел за различни исклучоци од програмата Fit for 55 и, особено, за проширувањето на Шемата за тргување со емисии во транспортните и станбените сектори.

10.  Приватен вселенски лет ќе ја доживее првата фатална несреќа. Компанија во САД ќе ја доживее првата фатална вселенска несреќа во приватен аранжман. Иако безбедносното досие на приватната вселенска индустрија ќе остане добро во целина, самата јавна загуба на поранешен член на актерската екипа на „Ѕвездени патеки“ ќе поттикне повици за регулација, па дури и за ренационализација на вселенската индустрија.