„Претстава за гости“: Опозицијата во Србија ја напушти средбата за изборните правила
Претставниците на коалицијата „Србија против насилството“ ја напуштија денешната средба со претставниците на власта за изборните услови, незадоволни од она што им беше понудено по тој повод.
Потпретседателката на Партијата на слободата и правдата, Мариника Тепиќ, на прес-конференцијата по средбата рече дека ја напуштиле „т.н. средба“.
„Нешто што требаше да изгледа како продолжение на дијалогот“, рече таа.
Според неа, колегиумот бил „само претстава за гости“.
На оваа трета средба на претставниците на опозицијата и власта, за разлика од претходните, присуствуваа и претставници на невладините организации – ЦРТА, ЦЕСИД и Транспарентност Србија. Таму беа и американскиот амбасадор Кристофер Хил и шефот на Делегацијата на ЕУ во Србија, Емануеле Жиофре, како и шефот на Мисијата на ОБСЕ во Србија, Јан Брату.
„Ги гледаме претставниците на оние земји што беа денеска на состанокот, земји чии институции си ја вршат работата… Ги прашав дали во нивните земји има избори каде вработените во јавниот сектор се обврзани зад поараванот да го заокружат Александар Вучиќ, а некои да бидат казнети затоа што не присуствувале на митинг на СНС“, рече Тепиќ.
„Ова не се само нелегитимни избори, тука имаме и проблем со незаконитоста на изборите, бидејќи имате злоупотреба на избирачкото право и Законот за живеалиште“, рече таа.
Таа додаде дека опозицијата на оваа трета средба се обидела да им покаже на гостите како изгледале претходните две и да покаже дека Ана Брнабиќ се обидува да ја префрли вината на нив.
„Дека ние не сакаме да учествуваме во дијалогот… Брнабиќ лажеше, бевме подготвени да седиме како во бункер дење и ноќе да најдеме решенија, бидејќи се бориме да одиме на избори, а ова ќе биде фарса на изборите“, рече Тепиќ.
Зоран Лутовац, претседателот на ДС рече дека предложил измена на дневниот ред.
„Бидејќи дневниот ред не беше договорен, предложив амандман на дневниот ред кој би го опфатил она за што разговаравме – прво да се имплементираат нашите три барања, кои се и препораки на ОДИХР, а кои треба да се исполнат со цел сите други препораки да имаат значење“, рече тој.
Со други зборови, објаснува Лутовац, кога ќе се договорат трите барања на опозицијата кои се однесуваат на избирачкиот список, медиумите и распишувањето на локалните избори во ист ден, тогаш, вели, имаат смисла и овие други препораки.
„Ако не се прифати и го решаваме еден по еден во време кога веќе е започнат изборниот процес, тогаш нема смисла“, потенцира Лутовац.
„Но, суштината е дека тие негираат дека има проблем со изборите и дека има политичка криза. Ние сме во криза, не само изборна, туку и длабока политичка криза“, рече Лутовац.