Премиерата на сценскиот спектакл „Сонцето, колку е блиску сонцето – Made in МNT“ на 13 ноември

Сценскиот спектакл „Сонцето, колку е блиску сонцето – Made in МNT“ во режија на Дејан Пројковски, со кој ќе се одбележи 80-тиот роденден на Македонскиот народен театар, премиерно ќе биде изведен на 13 ноември од 20 часот, по што ќе следуваат и изведби на 14 и 17 ноември, соопшти денеска МНТ. Билетите за  трите претстави ќе бидат пуштени во продажба од денеска преку веб-страницата www.mnt.mk

Претставата е најавена како аудиовизуелно патување низ македонската драматургија, поезија, проза и ликовна уметност, „емотивна приказна посветена на сите големи актери, режисери, драматурзи, но и на сите оние луѓе кои се зад кулисите и помагаат во создавањето на сценскиот универзум во МНТ“. 

-Идејата е преку создавањето на мултимедијални сцени на оригинален начин, пред сѐ преку силно визуелен израз, да се раскаже за 80-годишното театарско постоење на МНТ. Во оваа претстава ќе се доживее спојот на минатото и сегашноста преку клучните вредности на Македонскиот народен театар – љубов, умeтничка храброст, посветеност, визија, тимска работа, чување на традицијата и создавање нови вредности за иднината. Во претставата ќе учествува огромна актерска екипа од ансамблот на Македонскиот народен театар, соло пејачи, воздушни акробати и балетски играчи. Публиката ќе биде на едно големо патување во театарот на сонцето, наведува МНТ.  

Големиот сценски спектакл, како што додава, ќе спои повеќе изразни средства, со посебен акцент на воздушната акробатика и 3Д-видеомапингот.

Покрај режисерот Дејан Пројковски, во авторскиот тим се и Валентин Светозарев – сценограф, Горан Трајкоски – композитор, Сергеј Светозарев – дизајнер на 3Д-видеомапингот и Марија Пупучевска – костимограф.