Полицијата ги идентификувала напаѓачите во инцидентот во Чаир

Приведени се дваесет и едно лице пред фудбалскиот напревар меѓу „Левски“ и „Шкупи“, а за инцидентот во Чаир, каде има и едно приведено лице, идентификувани се повеќе напаѓачи и за скоро време деталите за овој инцидент ќе бидат соопштени, изјави денеска министерот за внатрешни работи Оливер Спасовски.

„Тоа беше меч оценет како меч од висок ризик. Меѓутоа, морам да кажам дека од почетокот на мечот до неговото завршување практично и да немавме некаков инцидент. На почетокот при влегувањето имавме една група навивачи кои дојдоа од соседна Бугарија и кои се однесуваа насилно кон припадниците на македонската полиција. Приведени се вкупно 21 лице, од кои 19 бугарски државјани и двајца македонски државјани кои се приведени и биле дел од навивачката група на ‘Шкупи’“, рече Спасовски, одговарајќи на новинарски прашања по поставувањето на камен-темелник на новиот објект на полициската станица во Аеродром.

Бугарските медиуми подоцна објавија дека навивачите на „Левски“ приведени во Скопје се ослободени. Глобата за хулиганството била платена со средствата собрани од симпатизерите на клубот.

Навивачите на „Левски“ претходно денеска собраа пари за да можат да ги платат казните на приведените со надеж дека ќе бидат ослободени.

Спасовски посочи дека македонската полиција била организирана за овој натпревар со предзнак од висок ризик и затоа навивачите од Бугарија, кои пристигнале на граничниот премин „Деве Баир“ биле преземени и во полициски кордон донесени на фудбалскиот стадион. За инцидентот во Чаир, како што појасни, најверојатно имало навивачи кои пристигнале со неколку возила.

„При поминувањето во Чаир, преку одредена провокација којашто ја прават, настанува конфликт при што знаеме дека има едно повредено лице. Таму веќе се идентификувани напаѓачите. Моментално работат колегите и јас очекувам за многу скоро време да ги имаме детално сите информации за што ќе ве известиме“, изјави Спасовски.

Првиот човек на македонска полиција порача дека спортските настани треба да бидат места за уживање, а не места во коишто ќе се продуцира насилство.

„Тоа е најважната порака што сакам да ја пратам до сите граѓани, посебно до сите спортски навивачи коишто учествуваат на спортските натпревари“, рече Спасовски. 

Премиерот Димитар Ковачевски синоќешните инциденти во Скопје ги оцени како хулигански судири.

„Пред сѐ, ова вчера беше резултат на однесувањето на хулиганите од двете страни. Десетина, 15-20 хулигани кои се степаа меѓу себе и повредија и полицаец. Благодарение на лекарите, тој беше преврзан и пуштен на домашно лекување“, истакна тој.