Пократка работна недела, повисоки бенефиции за невработените: Оваа земја во соседството објави револуционерни бенефиции

Според моделот наречен 80-90-100, кој се однесува на 80 проценти од работното време, 90 проценти од платата и 100 проценти од платените придонеси, делумно ќе ги вклучи во своето законодавство искуствата на земји како Исланд, Ирска и Германија.

Законот што ќе донесе вистинска револуција на пазарот на трудот делумно ќе стапи на сила во Словенија на 1 јануари 2026 година. Покрај зголемувањето на надоместоците за невработеност и јавните работи и олеснувањето на пристапот до пазарот на трудот за млади луѓе, студенти и пензионери, тој ќе им овозможи на луѓето што се приближуваат кон пензионирање да ги намалат своите работни обврски.

Според најавените измени, работниците над 58 години, како и оние со најмалку 35 години стаж, практично ќе можат да избираат помеѓу слободен петок, продолжен викенд или скратен работен ден од шест часа, потврди Министерството за труд, семејство, социјални работи и еднакви можности за словенечките медиуми.

Според моделот наречен 80-90-100, кој се однесува на 80 проценти од работното време, 90 проценти од платата и 100 проценти од платените придонеси, Словенците делумно ќе ги вклучат во своето законодавство искуствата на земји како Исланд, Ирска и Германија. Во овие земји, ваквите закони доведоа до позитивни резултати како што се зголемена продуктивност, намалено отсуство од работа и поголема ефикасност.

Пилот-проектите спроведени во словенечките технолошки компании покажаа дека овој вид систем функционира и локално, според Министерството за труд предводено од Лука Месец од Левичарската партија.

Министерството за труд објави дека, доколку промените во законот се покажат како успешни, ќе се движи кон дополнителна либерализација на регулативите, па до крајот на 2028 година може да се очекуваат промени како што се бонус за работа во сабота, задолжителен божиќен бонус за сите вработени и конечно – триесетчасовна работна недела.

Кој би можел да добие бенефиции и подобри услови за работа во Словенија?

Оваа прва рунда промени вклучува и некои други мерки, па невработените Словенци ќе уживаат во повисоки надоместоци за невработеност од 2026 година. Максималниот износ што невработените ќе го добиваат во текот на првите три месеци по отпуштањето или раскинувањето на договорот за вработување ќе биде 130 проценти од просечната бруто минимална плата во земјата, што во моментов изнесува нешто повеќе од 1.660 евра. Доколку не најдат нова работа по три месеци, ќе имаат право на 110 проценти, потоа 100 проценти, до 70 проценти од просечната бруто минимална плата.

Учениците, студентите и учесниците во јавни работи, исто така, очекуваат значителни промени и зголемени бенефиции, кои покрај повисока минимална плата по час ќе имаат подобрени услови за работа. Планирани се стимулации за вработување на невработени лица над 59 години, во износ од 40 проценти од месечниот нето износ на паричен надоместок, а оваа категорија ќе има право на повеќе дозволени часови работа за привремени или повремени работи. Месечното ограничување на работа за пензионерите е зголемено од 60 на 85 часа месечно, а максималната годишна плата е соодветно зголемена.