Поетската книга „Изреченото нѐ прогонува“ на Никола Маџиров објавена на италијански јазик

 Италијанската издавачка куќа „Крочети Едиторе“ ја објави поетската книга „Изреченото нѐ прогонува“ на Никола Маџиров на италијански јазик. Книгата содржи избор од неговото поетско творештво и објавена е во рамки на поетската едиција на италијанскиот издавач со седиште во Милано на 1-ви април, заедно со поезијата на Волт Витман.

Во истата едиција се објавени и книгите на венцоносците од Струшките вечери на поезијата Јехуда Амихај, Јанис Рицос, Керол Ен Дафи, Махмуд Дарвиш и добитниците на Нобеловата награда – Томас Транстромер, Јон Фосе, Одисеас Елитис, Сен-Џон Перс, како и избори од поезијата на Рилке, Бодлер, Кавафис, Томас Бернхард, Ен Карсон, Дилан Томас, Сеферис, Емили Дикинсон, Борис Пастернак и др., соопшти Маџиров.

Италијанските списанија за култура и литература „Ил Манифесто“ и „Пангеа“ објавија интервјуа со Никола Маџиров, а првата промоција на книгата „Изреченото нѐ прогонува“ и поетското читање ќе се случи утре во рамки на меѓународниот фестивал за литература „Inroci di Civilta“ во Венеција каде почесен гостин е Ханиф Курејши. Книгата ќе биде претставена и на неколку други фестивали и универзитети во Италија и во Швајцарија во текот на оваа година.

Никола Маџиров е најмладиот современ странски автор објавен во поетската едиција на „Крочети Едиторе“, а книгата „Изреченото нѐ прогонува“ е двојазично издание и содржи песни на италијански и македонски јазик.