Подновено и со нови училници и кабинети ООУ „Коле Неделковски“ ја почнува учебната година
Учебната година во ООУ „Коле Неделковски“ започна со доградба на ново отворено крило за учениците.
– Ги исполнивме ветувањата, инвестиравме 43 милиони денари од општинскиот буџет и отворивме нови и осветлени училници, кабинети за психолог и педагог, библиотека, лифт и тоалет за непречено движење на учениците со потешкотии во движењето како и пристапна рампа за полесен пристап во училиштето – рече градоначалникот Горан Герасимовски, по денешната посета.
Инвестицијата вклучува и енергетски ефикасна фасада, скалишното јадро од природен гранит со терацо под во ходниците, дабов паркет во училниците, мијалници, клима уреди и подни инсталации за смарт табли и компјутери.
Герасимовски ова го смета за вложување во образованието и подобрата иднина на децата.