Почина поранешниот претседател на Италија Џорџо Наполитано

Џорџо Наполитано, претседател на Италија во два мандати и еден од најугледните италијански политичари, почина денеска на 98-годишна возраст.

Наполитано почина во болница во Рим, а неговата здравствена состојба веќе извесно време беше критична, пренесува АНСА.

Роден е во Неапол на 25 јуни 1925 година, а дипломирал право на Универзитетот во Неапол во 1947 година. Тој се приклучил на Комунистичката партија на Италија во 1945 година, а осум години подоцна за прв пат станал пратеник.

Тој стана дел од Демократската партија на левицата во 1991 година, а од 1996 до 1998 година беше министер за внатрешни работи во владата на Романо Проди. За време на неговата долга политичка кариера, Наполитано беше член на Европскиот парламент, како и претседател на Долниот дом на италијанскиот парламент.

Неговата долга политичка кариера го однесе и во Стразбур како член на Европскиот парламент од 1989 до 1992 година, пред да биде избран за претседател на Долниот дом на Италија од 1992 до 1994 година.

Неговата доминација на италијанската политичка сцена – а особено неговата клучна улога во создавањето итна влада предводена од Марио Монти среде кризата со државниот долг во 2011 година – му го донесе прекарот Кралот Џорџ. Ова не им одговараше на многумина од десницата кои рекоа дека помогнал да се стави крај на последната влада на Силвио Берлускони, наводно во дослух со европските власти. Редовно беше на врвот на анкетите на најпопуларните италијански политичари.