Пентагон ја отстрани Турција од воздушна мисија во Сирија

Министерството за одбрана на САД ја отстранило Турција од учество во воздушна мисија во Сирија, предводена од Центарот за заеднички воздушни операции.

На Турција и било прекинато доставување разузнавачки и информации за надзор, соопшти портпаролката на Пентагон Карла Глејсон.

На прашањето дали тоа значи затворање на сирискиот воздушен простор за Турција, портпаролката рече: „Технички не значи точно тоа, но кога еден фактор е отстранет од воздушна мисија, станува речиси невозможно да се лета без координација во таа зона“.

И покрај заканата од американскиот претседател Доналд Трамп дека ќе ја уништи турската економија доколку Анкара спроведе операции во Сирија, турската армија продолжува да префрлува воена опрема и командоси на сириската граница за евентуална задрганична операција.

Конвој од околу 100 оклопни возила биле пренесени во граничната област Хатај, а долж границата биле распоредени командоси од специјалните сили. „Турската армија е подготвена и чека наредба да почне операција во источна Сирија против курдските терористи“, јавуваат турските медиуми.