Пендаровски разговараше со португалскиот шеф на дипломатијата за кревање на блокадата во ЕУ

Претседателот Стево Пендаровски денеска во Малме, на маргините на Меѓународниот форум за сеќавање на холокаустот, оствари средба со министерот за надворешни работи на Португалија, Аугусто Сантош Силва.

Претседателот Пендаровски и министерот Силва на средбата разговараa за можностите за напредок на Северна Македонија во евроинтеграциите, во пресрет на одржувањето на состаноците на Европската унија до крајот на оваа година.

Заблагодарувајќи се за досегашната поддршка и конструктивните предлози од Португалија за надминување на блокадата предизвикана од приговорите на Бугарија, претседателот Пендаровски подвлече дека продолжениот застој во процесот на проширување на Европската унија ќе има долгорочни негативни последици врз развојот и стабилноста на целиот регион и притоа изрази очекување дека поддршката од Португалија ќе се интензивира во наредниот период.

Двајцата соговорници на средбата изразија очекување дека уште за време на тековното словенечко претседавање со ЕУ ќе биде направен исчекор во процесот на пристапување на Северна Македонија во ЕУ.

На средбата претседателот Пендаровски и министерот Силва разговараа и за билатералните односи на двете држави, при што изразија подготвеност за унапредување на севкупните односи, како и развој на политичкиот дијалог на највисоко ниво.