Османи ќе го посети претепаниот секретар на бугарскиот клуб

20/01/2023 11:24
Министерот за надворешни работи Бујар Османи ќе го посети претепаниот секретар на бугарскиот клуб „Цар Борис Трети“. Тој го најави тоа на денешната прес конференција во МНР, додавајќи дека е во комуникација со институциите околу случајот. Османи притоа  остро го осуди овој напад и повика надлежните да го расчистат случајот.

-Уште од вчера сум во комуникација. Колку што знам напаѓачите се идентификувани и се работи за да се изведат пред лицето на правдата. Нема да дозволиме никој поради политички интереси или други погледи да го загрози тоа што го постигнавме во изминатиот период. Очекувам веднаш по оваа прес-конференција и да го посетам нападнатиот бидејќи се работи за граѓанин на Северна Македонија. Никој не треба да биде нападнат поради својот идентитет. Сите мораме да реагираме за да не се случи ова повторно, рече Османи.

 
Од Софија пак стигна најава дека нашата амбасадорка таму, Агнеса Руси Поповска, ќе биде повикана во бугарското МНР  за да и биде врачена протестна нота, како реакција за нападот врз секретарот на бугарскиот клуб, Христијан Пендиков.Бугарското МНР ќе побара од властите во Македонија да преземат итни и ефективни мерки за борба против злосторствата од омраза врз Бугарите, а министерот за надворешни работи на Бугарија, Николај Милков во телефонскиот разговор со Бујар Османи добил уверување дека ќе ја добијат потребната помош од локалните власти.

 
–Привремениот раководител на Генералниот конзулат на Република Бугарија во Битола и екипа од бугарската амбасада во Скопје се во контакт со повредениот државјанин и се испратени во Охрид. Бугарската држава со месеци упорно го потенцираше своето очекување властите во Северна Македонија да преземат итни и ефективни мерки против сериозната ескалација на злосторствата од омраза и манифестации против Бугарите во земјата.Бугарската страна сè уште нема добиено официјални информации за истрагата и спроведувањето на правдата во врска со последните напади, вклучително и пукање со огнено оружје врз организацијата „Цар Борис III“ од крајот на 2022 година. За жал, нападот од 19 јануари 2023 година е пример за тешките последици од системското отсуство на адекватен одговор и посветеност од страна на Северна Македонија, вклучително и неможноста да ја исполни својата главна обврска – да ја гарантира безбедноста на сопствените граѓани, соопштија од бугарското МНР.

 

Бугарија очекува надлежните органи во Северна Македонија да преземат итни активности за откривање, изведување пред лицето на правдата и казнување на сторителите на кривичното дело, имајќи ја предвид сериозноста на делото.

-Очекуваме земјата која ја декларира својата желба да биде дел од Унијата заснована на слобода, демократија и владеење на правото, да вложи доследни и реални напори за исполнување на своите заложби поврзани со заштитата и гарантирањето на човековите права. За жал, последниве месеци сме сведоци на токму спротивните трендови во општеството на Северна Македонија. Постоењето на проблеми со правата на Бугарите во Северна Македонија не може да продолжи да се негира и од локалните власти и од меѓународните партнери. Очигледно, тоа само води кон нивно продлабочување и е неспоиво со членството во Европската Унија, стои во реакцијата од Софија.

Запрашан претходно дали се планира бугарскиот европратеник Ангел Џамбаски да биде прогласен за персона нон грата во земјава, министерот Османи изјави дека МНР размислувало за тоа прашање, но се поставила дилемата дали со таквата постапка нема да се влезе во неговата приказна, да му се даде можност за промовирање и да се игра неговата игра.

– Мислам дека целта на господинот, колку што е да провоцира, е и да се промовира, да предизвика реакција кај нас и таа реакција да ја искористи во својата политичка промоција. Тој е маргинален лик, изјави Османи.

Тој нагласи дека партијата на Џамбаски на последните избори во Бугарија не влезе ни во Парламентот и на нив по секоја цена им треба внимание, а бидејќи не можат да го провлечат во нивната земја, се обидуваат тоа да го направат со провокации кај нас.

– Не сакаме да им дадеме премногу тежина на такви маргинални провокатори. Ако тоа беше изјава на министер, на пратеник во бугарското Собрание, тоа  ќе имаше други импликации. Меѓутоа ние сега да правиме приказни од провокатори, кои не ги сака ни нивното општество… Извинете, но не сакам да ја играм нивната игра, додаде Османи.

Поврзани содржини

Сиљановска гледа решение во креативно толкување на Преговарачката рамка
Таравари: Јас поднесувам оставка, другите ќе бидат разрешени
Вицепремиерот Фетаи му врти грб на Таравари, сакал да остане во владата
Мицкоски уште чека Бугарија да попушти, тоа ќе му го каже на Кошта утре
Кошта во Црна Гора: Добрите односи со соседите членки на ЕУ се клучни во преговорите
Министерството за здравство останува во коалицијата „Вреди“, вели Билал Касами
Законот на СДСМ за помош на семејствата од Кочани не помина во Собранието
Мануел Сарацин: Речиси никој на Балканот не сака да прави реформи

Најчитани