Општина Аеродром ги повикува жителите да пријават штети од излевањето на Маркова Река

По обилните дождови во изминатите денови, од своето корито се излеа Маркова Река, при што се поплавени и делови по течението во Горно Лисиче.
Веднаш по излевањето беше ангажирана механизација што работеше на одводнување на коритото на реката и на заштита од евентуални поплавувања на објектите за домување.

В.д. градоначалникот на Општина Аеродром, Дејан Митески, веднаш стапи во контакт со Дирекцијата за заштита и спасување (ДЗС), МВР и АД Водостопанство, чии претставници излегоа на терен и ги презедоа сите неопходни мерки за превенција со цел да се спречи поплавување на домовите што се наоѓаат во близина на текот на реката во Горно Лисиче. Екипите се постојано на терен и ја следат ситуацијата.

Според информациите од терен, нема нанесени штети на куќи, но се поплавени неколку магацини и земјоделски објекти, како и дел од полето во Горно Лисиче.
Оттука, Општина Аеродром ги повикува жителите што имаат имот во поплавеното подрачје да ги пријават материјалните штети со поднесување пополнет образец во Архивата на Општина Аеродром или во Урбаната заедница во Горно Лисиче, секој работен ден од 8:00 до 15:00 часот.
Рокот за поднесување на пријавите трае десет работни дена од денот на излевањето на Маркова Река што се случи на 1 април (вторник), односно повикот ќе трае заклучно со 14 април (понеделник).

Образецот може да се најде на овој линк: http://aerodrom.gov.mk/dokumenti/formulari, како и во Општина Аеродром или во Урбаната заедница во Горно Лисиче. Покрај пополнување на ова барање, подносителите треба да достават важечки документ за идентификација, доказ за сопственост (копија од имотен лист), како и фотографии од локацијата по претрпената штета.

Инаку, поради излевањето на Маркова Река, поплавени се куќи, магацини и индустриски објекти во Студеничани, Батинци, Пинтија и Горно Лисиче. До 10 часот, состојбата е стабилизирана со намалено ниво на вода, а ЈКП „Комунална“ интервенирала со чистење на речното корито.

Мостот кај Љубош бил привремено затворен, но до 11:15 е пуштен за сообраќај по контрола, со планови за дополнително зацврстување.

Општина Аеродром: Пријавени поплавен магацин и оштетен коловоз на Булевар „Кузман Јосифовски-Питу“. Мостот меѓу Горно и Долно Лисиче е отворен само за лесни возила.

Општина Кисела Вода: Оштетени 110 пчелни семејства и сандаци кај Сепарација, поплавен мебелски салон на булевар „Борис Трајковски“, и нанос на дрвена маса во каналите кај Драчево.

Општина Студеничани: Продолжени пријави за поплавени објекти во Батинци, вклучувајќи оштетен магацин.

Општина Чучер Сандево: Реката кај мостот кон Kучевиште не претставува опасност по проверкатa.

Општина Сопиште: Целосно поплавена куќа во селото Држилово со прекин на струја.