Од пиво до пенкала: Јужна Кореја ги бојкотира јапонските стоки

Јужна Кореја – Веднаш штом менаџерот на супермаркет, Чо Мин-хјук, дојде на работа утредента откако Токио ги наметна ограничувањата за извоз во Јужна Кореја, ги извади сите јапонски производи од полиците.

Тоа беше начинот на Чо да се заземе став против Јапонија во брзо влошениот политички и економски спор меѓу двата соседа од Источна Азија.

Таквиот гнев предизвика широк бојкот на јапонските производи и услуги, од пиво до облека и патување, нарушувајќи ги бизнисите во она што веќе беше еден од најлошите економски услови за Јужна Кореја во една деценија.

Чо, кој управува со супермаркет „Пурунемарт“ од 1.500 квадратни метри во Сеул, доброволно ја презеде акцијата. Над 200 други супермаркети и продавници го прават истото, според асоцијација „Кореја март“, трговска група што ги претставува.

„Јапонија врши притисок врз Јужна Кореја преку извозот не покажувајќи жалење поради своите минати злодела, а тоа е сосема неприфатливо“, рече Чо додавајќи дека падот на продажбата од 10 до 15 отсто нема да го премисли.

Дипломатските тензии се интензивираа откако јужнокорејскиот суд минатата година им нареди на јапонските компании да им дадат надомест на Корејците кои беа принудени да работат за јапонски окупатори за време на Втората светска војна. На 4 јули, во очигледна одмазда, Јапонија го ограничи извозот на високотехнолошки материјали во Јужна Кореја, но негираше дека овој потег е поврзан со прашањето за компензацијата. Токио го цитираше „несоодветното управување“ со чувствителниот извоз, при што јапонските медиуми објавија дека некои предмети завршиле во Северна Кореја. Сеул го отфрли тоа.

Сеул се воздржа од преземање какви било контрамерки велејќи дека спорот ќе го покрене во Светската трговска организација. Но Корејците ги преземаат работите во свои раце, а пивото очигледно е лесна цел.

Јужна Кореја купува 61 отсто од извозот на пиво на Јапонија, во 2018 година потрошија 7,9 милијарди јени (73 милиони долари). „Асахи супер сур“ е најпопуларниот увезен бренд, со тројно зголемување на продажбата во последните пет години, според Евромонитор.

„Џеџу ер“ и „Кореја ер“ известија за „мал пад“ во резервациите за Јапонија. Јапонскиот моден бренд „Уникло“, кој продава облека вредна околу 140 милијарди јени – 6,6 отсто од својот приход – во 186 корејски продавници, исто така, го чувствува гневот.

„Постои одредено влијание врз продажбата“, изјави главниот финансиски офицер Такеши Окакаки за новинарите минатата недела, без да елаборира.

Засега, емоциите се на високо ниво. Џан Бум-џин, 34-годишен вљубеник во „Марвел“, рече дека ги фрлил сите негови јапонски пенкала и нема да го гледа најновиот филм за Спајдермен, кој го дистрибуира „Сони пикчерс“ – компанија со седиште во САД во сопственост на јапонската компанија „Сони корп“.

„Го сакам Спајдермен, но јас се борам против мојата желба да го гледам“, рече тој. (Ројтерс)