Обои ме
ЛЕЈЛА САБИТ
Хитот на Калиопи „Обои ме“ стана стварност.
Кој што стигне, не фарба во Македонија и во светот.
Во фризерница, на фасади, на билборди, со зборови, на дело и онлајн.
Животот и размислувањето не се веќе црно-бели.
Црното стана опасно, белото е забрането.
Исончаниот тен е престиж, ама не е здрав, белиот тен е аристократски ама никој не го цени.
Ни се случува шарена (р)еволуција.
Бринетите стануваат русокоси, русокосите-бринети, а посмелите- и црвенокоси.
Жените (се уште) не излегуваат од црно, мислејќи дека се послаби, а мажите почнаа да носат розово зашто им се подигна свеста за жените.
Која боја да изберете летово, ќе ви судат.
Модните критичари, докторите, политичките експерти, домашните или јавноста.
Црвената и сината сега се ин, а потоа може да станат аут.
Жолтата дречи, а може да ве прогласат и за геј.
Зелената никој не ја сака, а може да ви препишат дека сте зелени во памет или екологист меѓу толку многу ѓубре околу нас.
Се уште е тренд да фатиш малку боја летово ако имаш каде.
Ако избереш сенка –значи не си во позиција и не си влијателен.
Ако претераш на сонце- можеш да изгориш, да ти се појават дамки и брзо да се збрчкаш.
Некоја боја тешко се вади, а уште потешко се пере.
Затоа внимавајте што ќе носите, што ќе кажете и што ќе направите.
Во Македонија ( и во светот) или предолго се памти или пребрзо се заборава!