Нов правилник за велопатеки и субвенции за купување велосипеди

Заменик-претседателот на Владата и министер за транспорт, Александар Николоски, заедно со стручните служби од Секторот за урбанизам и патен сообраќај, остварија работна средба со претставниците на граѓанското здружение „Биди зелен“.

Тема на средбата беше иницијативата на граѓанското здружение во однос на креирањето нови прописи со кои се уредуваат планирањето и проектирањето велосипедска инфраструктура во населено место и надвор од него. На средбата беше потврден фактот дека недостига инфраструктура за велосипеди, како услов за безбеден сообраќај, но и како еден од главните фактори за намалување на аерозагадувањето.

Николоски ја поздрави оваа иницијатива и истакна дека Министерството е подготвено, со заедничка соработка со граѓанските здруженија, да бидат креирани нови нормативи и стандарди за во иднина квалитетно да се планира и да се реализира велоинфраструктурата.

Исто така, министерот Николоски ја истакна подготвеноста на Министерството, во следната буџетска година, да се предвидат и средства за субвенции за купување нови велосипеди со цел да се намали користењето автомобили и да се влијае врз намалувањето на аерозагадувањето, како мерка за заштита на животната средина.

Министерот испрати и апел до сите општини, во рамките на финансиската поддршка за општините од 250 милиони евра планирана за следната година, општините да аплицираат за проекти за изградба на велосипедски патеки со цел да се подигне квалитетот на велоинфраструктурата на општинско ниво и да се поттикне користењето велосипеди во урбаните средини.

Во следниот период, стручните служби од Министерството и претставниците на граѓанското здружение „Биди зелен“ заеднички ќе работат на креирање нови прописи за планирање, проектирање, изградба и одржување на велосипедската мрежа.