Ноќно снимање на „Збогум Копакабано“ во режија на Милчо Манчевски (фото)

 Во Старата скопска чаршија во Даут пашин амам, синоќа, се одржа ноќно снимање за филмот „Збогум Копакабано“ во режија на Милчо Манчевски, во продукција на „Банана филм“. На снимањето беа поканети медиумите, кои беа дел од сетот на 15 ден од снимањето на локации низ и во околината на Скопје, и уште толку ќе се снима. Филмот, доцна синоќа, продолжи да се снима во центарот на главниот град, за што имаше времен режим на сообраќај од раскрсницата кај Црвен Крст до раскрсницата кај Градска болница, во времетраење од 22 часот до 4 часот во раните утрински часови. 

И во овој осми филм на Манчевски, кој чекаше на реализација три години, покрај емотивниот уметнички аспект (темата на сестринска љубов), се истражуваат и општествено релевантни теми – самотија, сиромаштија, корупција, ментални болести, општество засновано на привилегии на богатите. Иако се случува во современа Македонија, филмот содржи и универзален коментар, размислување за тоа како луѓето живеат и се поврзуваат во современиот свет. Освен Агенцијата за филм, филмот го помогнаа и националните филмски фондови, приватни инвеститори од Бугарија, Србија, Албанија, Италија и Англија, македонски компании и културни институции.

Главните улоги ги играат: Сара Климоска, Филип Трајковиќ, Соња Михајлова, Петар Мирчевски, Јордан Симонов, Дејан Лилиќ, Јасмина Василева, Стефан Николовски, како и Калина Наумовска, Ана Костовска, Иван Ѓошевски, Виктор Арсов, Марина Поп Панкова, Сара Панковска, Александар Степанулески и Марин Гавриловски.

Дејвид Манс од Велика Британија е дизајнер на продукција. Директор на фотографија е искусниот Стефано Фаливене од Италија. Кастинг директорка на филмот е Милка Анчевска, костимите се на Жаклина Крстевска, шминката на Бистра Кечиџиева. Продуцент на филмот е Јане Ќортошев.

– Филмот ќе биде посмешен за разлика од неговите претходни. Како што појасни, се работи за еден вид комедија, но и тажна приказна за брат, сестра и шахта. – Никогаш не работам со однапред зададена агенда, рече Манчевски, односно задачата ми е да раскажам приказна. Неговиот интерес, вели, се заплетот и луѓето.

– Мене ме интересира заплетот, ме интересираат луѓето. Е сега, работејќи на тоа, кога работиш две, три, пет години кога-како, ако е добар процесот и ако има синергија со соработниците, а овој пат имам феноменални соработници и меѓу глумците и меѓу екипата, вредните работи, темите или ако сакате пораките, сами испливуваат на површината и стануваат и поинтересни и повидливи и порелевантни, рече Манчевски.

Актерот Јордан Симонов во изјава за медиумите истакна дека ова е негова четврта соработка со Манчевски, која како што рече, претставува еден вид врв на нивната соработка.

– Сум работел претходно во „Before the rain“, во „Dust“, во „Сенки“ и сега ова го гледам како еден вид врв на соработката. Секое снимање филм е посебно доживување, тоа носи посебна енергија и магија, а луѓето и актерите кои што работат во него ја чувствуваат таа енергија … Во овој филм имам поголема задача, на пример, втора работа, како да ви кажам, само тоа што имам позначајна задача во филмот, одговорноста е поголема. Така што се надевам дека го постигнав она што требаше да се постигне, го доловив ликот на Панче Герамида, еден транзиционен јунак кој ги чувствува сите тешкотии од транзицијата, она што сите го чувствуваме живеејќи во Македонија 30 години, истакна Симонов. 

Сара Климоска која ја игра главната улога, Малина и Филип Трајковиќ кој го глуми Виктор, братот на Малина, велат дека се уиграна двојка.

“ Во овој филм, секој лик е комплексен и повеќеслоен, како и во животот. Сепак, публиката ќе креира свои видувања, доживувања и расудувања за ликовите. Не би можела да ја одиграм Малина без да ја сакам и без да си ги оправдам сите нејзини постапки, размисли и емоции“, рече на снимањето, Климоска.

Улогата на Виктор, братот на Малина, ја игра Филип Трајковиќ. Виктор е комплексен човек. Тој е и момче со интелектуална попреченост. Вакви ликови претходно успешно играа Леонардо Ди Каприо, Дастин Хофман, Шон Пен, Џон Малкович…

„Голема одговорност е ова. Ваква улога е една од најпосакуваните во кариерата на еден актер. Се надевам дека ќе ја оправдам довербата на Милчо“, рече Филип, на ноќниот сет. (Л.С.)