„Ное цирхер цајтунг“: Проширувањето на ЕУ е мртво
Според влијателниот швајцарски весник, новата идеја на Макрон била „освежувачка“
Предлозите на Макрон за „европската политичка заедница“ се „освежувачки реални“, според угледниот швајцарски весник „Ное цирхер цајтунг“ (НЦЦ). Се наведува дека политиката на проширување на ЕУ кон земји како Србија и онака е „мртов коњ “.
Емануел Макрон, претседателот на Франција, која моментално претседава со ЕУ, оваа недела претстави визија која наиде на поделени реакции. Има места за земјите од Западен балкан, но и за Украина, Грузија, Молдавија, па дури и Велика Британија.
Тие не би биле полноправни членки на ЕУ, туку дел од една поширока и полабава „европска политичка заедница“ која би ја усогласила безбедносната, енергетската или транспортната политика со ЕУ.
НЦЦ објаснува зошто ја смета идејата на Макрон „освежувачка“: „Претседателката на Европската комисија, Урсула фон дер Лајен, отвори пристапна перспектива за Украина“. Но, таквите ветувања е невозможно да се исполнат во догледна иднина. Како и да е, сегашната политика на проширување на ЕУ практично не успеа“.
„Земјите како Србија, Албанија и Турција со години се сметаат за официјални кандидати за пристап. Но, Брисел со тоа јава мртов коњ – овие земји се далеку од исполнување на критериумите“, оценува НЦЦ.
„Во интерес на Европа, би било појасно да се разликува кругот на земји кои делумно тесно соработуваат со ЕУ, но не се членки. „Во Србија и на други места, каде што Брисел го загуби своето влијание, навлегуваат авторитарни држави како Кина и Русија“, додава весникот.
Се потсетува дека на почетокот на месецот австрискиот министер за надворешни работи Александар Шаленберг беше на слична трага како Макрон, кој тогаш за „Фајненшел тајмс“изјави дека не може да има вакуум во земји како Украина и Молдавија: „Или нашиот модел ќе биде таму или туѓи“, рече тој.
Наведувајќи дека идејата за Европа во поконцентрични кругови или Европа со повеќе брзини не е нова, НЦЦ пишува дека денес е време за таа дебата. „Макрон и Шаленберг даваат одговори на стратешкиот предизвик наметнат од инвазијата на Путин на Украина. Ако ЕУ навистина сака да биде геополитички играч, мора да најде нов пристап“.