Нил Јанг стравува дали ќе се врати во САД по критиките за Трамп

Канадско-американскиот музичар Нил Јанг изјави дека е загрижен дека ќе му биде забрането да се врати во САД по европската турнеја поради неговата долгогодишна критика на американскиот претседател Доналд Трамп.

На својата веб-страница „Нил Јанг Архива“, 79-годишниот музичар напиша дека може да биде „забранет или затворен и да спие на бетонски под со алуминиумско ќебе“ по враќањето во САД, осврнувајќи се на неодамнешните случаи на приведување и депортација на лица кои ја критикуваа администрацијата на Трамп, пишува Гардијан.

„Ако се вратам од Европа и ме спречат да влезам во САД, сите што купија билети за моите концерти нема да можат да дојдат на шоуто. Ако кажете нешто лошо за Трамп или неговата администрација, можеби нема да можете да се вратите во САД ако сте Канаѓанец. Ако сте како мене – лице со двојно државјанство – кој знае? Ќе дознаеме заедно“, напиша тој.

Музичарот, кој стана американски државјанин во 2020 година, претходно јавно го критикуваше Трамп, нарекувајќи го „срам за земјата“.

Тој, исто така, се обиде легално да го спречи Трамп да ја користи неговата песна „Rockin’ In the Free World“ за време на неговите митинзи, пренесува Гардијан.