Нигериската армија спасила 25 заложници, меѓу кои и деца, киднапирани од исламските бунтовници

Нигериската војска денеска соопшти дека спасила 25 заложници, главно жени и деца, кои ги држеле исламските екстремистички бунтовници во североисточниот регион на земјата, кој е во центарот на џихадистичкото насилство од 2009 година.

Нигериската армија соопшти дека нејзините сили ги спасиле заробениците за време на „операција за чистење“ во областа Гвоза во државата Борно.

Четиринаесет заробеници прво беа спасени во саботата во селото Гобара, додека 11 други беа ослободени во неделата кога армијата изврши рација во засолништето на бунтовниците во селото Гава, на околу 130 километри од главниот град Борно, Мајдугури, изјави воениот портпарол.

Армијата објави слики од ослободените заложници, меѓу кои имало и мали деца. Повеќето од нив изгледале неисхрането и носеле искинати алишта, што укажува дека најверојатно биле подолго време притворени.