Нетанјаху најави дека Израел ќе продолжи со нападите врз Хезболах во Либан

Израелскиот премиер Бенјамин Нетанјаху најави дека неговата земја ќе продолжи со нападите врз Хезболах во Либан.

-Ќе продолжиме да го напаѓаме Хезболах. И му велам на либанскиот народ: нашата војна не е против вас, нашата војна е против Хезболах, рече Нетанјаху во видеото објавено од неговата канцеларија.

Министерот за одбрана Јоав Галант даде слични зборови претходно во говорот пред војниците: „Мораме да продолжиме додека не ја постигнеме нашата цел: да обезбедиме безбедно враќање на жителите на северен Израел во нивните домови“.

Галант додаде дека либанското движење, кое е поддржано од Иран, претрпе сериозни удари во текот на изминатата недела: „Денешниот Хезболах не е ист како оној што го знаевме пред една недела“.

Прекуграничната размена на оган меѓу Хезболах и израелската војска започна по почетокот на војната во Појасот Газа меѓу Израел и Хамас, предизвикана од нападот на палестинското исламистичко движење на 7 октомври на израелска територија.

Хезболах тврди дека истрелува ракети кон Израел како поддршка на Хамас, неговиот сојузник.

Оваа размена на оган предизвика раселување на десетици илјади луѓе од двете страни на израелско-либанската граница.

Судирите се интензивираа по бранот експлозии на комуникациски уреди на Хезболах на почетокот на минатата недела, во кои загинаа 39 лица, а беа ранети 2.931, според либанските власти.

Хезболах и Иран го обвинија Израел за експлозиите.