„Не шетајте ме по ќерамиди“, гневно реагира Никола Пановски до Град Скопје

Грдите, недоправени и речиси опасни објекти во центарот на главниот град, беа тема на советничко прашање од страна на советникот во Град Скопје, Никола Пановски (ЛДП), кој се интересираше зошто овие објекти (некои и повеќе од 20 години), стојат изложени на забот на времето и за нив ништо не се презема.

На седницата на Советот на Град Скопје посветена на советнички прашања Пановски рече дека е свесен дека дел од нив не се во надлежност на градот, но логично му беше токму од Градот да се потегнат работите и објектите како „Кермес“ во Градскиот парк, Офицерскиот дом на плоштадот и неизградениот хотел во близина, галиите во Вардар, фасадите на зградите од ЕСМ и „Пелагонија“ повеќе да не го нагрдуваат градот, туку да станат репрезентативни.

По две недели Пановски написмено доби одговор на своите прашања од Градот, многу штур, во кој поенатата е дека за повеќето објекти се ненадлежни.

„Во врска со прашањето поврзано со објектот на ‘Кермес’ во Градски парк, ве известуваме дека истиот е во приватна сопственост и Град Скопје нема надлежност.

Во врска со прашањето поврзано со галиите во река Вардар, ве известуваме:
– за галијата кај ‘Холидеј ин’, Град Скопје има правосилна судска пресуда и истата е во фаза на реализација со цел отстранување на галијата, во наредниот период одлуката ќе се дореализира;
– за галијата кај објектите на МЕПСО и ЕЛЕМ, Град Скопје води судска судска постапка, поведена од закупецот на галијата фирмата ‘Фаланга Херонеа’. По завршување на судската постапка ќе се дефинираат понатамошните постапки;
– за галијата кај ГТЦ, не се водат постапки и истата е во функција.

Во врска со прашањето поврзано со објектите на плоштадот ‘Македонија’, Офицерски дом и планираниот хотел, ЕСМ и ‘Пелагонија’, ве известуваме:
– објектот на Офицерскиоот дом и хотелот се во приватна сопственост , каде надлежен орган за следење на нивната изградба е Општина Центар:
– фасадата на објектот ЕСМ не е во надлежност на Град Скопе и за истата немаме информации;
– за фасадата на ‘Пелагонија’ Град Скопје има судски спор со фирмата ‘Д-р Пановски’ која побарува обештетување – надоместок за изгубена добивка и надомест на штета“, стои во одговорот до Пановски, кој „Независен весник“ го има на увид.

Пановски коментира дека одговорот на неговите прашања е „очекувано бирократски, не сме надлежни, без суштина“.

„Ако е надлежна Општина Центар – прашате ја! Не шетајте ме по ќерамиди“, вели Пановски.

„’Кермес’ бил приватен, но земјиштето во паркот не е приватно. Не смее во градот да стои грдотија со години. Или ќе се гради или ќе се ослободи просторот. Истото важи и за Офицерскиот дом. Има Закон според кој мора да се забрза објект во центар на градот во определен рок, инаку државата му го одзеа. За зградата на ЕВН не знаат и не им е гајле. А објектот на ‘Пелагонија’ е на ‘Д-р Пановски’ (фирма со која јас немам никаква врска, случајно е исто презимето). За галијата кај ‘Холидеј Ин’ не кажаа зошто и кој нареди прекин на отстранување, кое почна пред изборите, дојде некој анонимен газда ги избрка работниците и седум месеци стои така!“, коментира Пановски.

Ако еден советник во градскиот совет не може да добие одговор, новинарите исто, во повеќе наврати прашувале, а одговорот се губел во префрлање на одговорноста по принципот „на ти го – дај ми го“, се поставува прашањето како да се покренат работите.

Не може да има закони за тоа кој, што и како треба, а да нема надлежен за повикување на одговорност кога нема да се испочитува договореното. Ако и има надлежни за надзор, тогаш тоа треба да е ограничено и со временски рок, а не да ни се случува „Кермес“ да стои нечепнат, на забот на времето среде Градскиот парк, и да не се знае кој може да го отстрани или догради.