Народниот театар „Војдан Чернодрински“ од Прилеп ја објави програмата за 75. јубилеј

Со цела недела претстави и гостувања на театарски ансамбли од земјава, Народниот театар „Војдан Чернодрински“ – Прилеп ќе одбележи 75 години постоење и театарска уметност. Театарот ја почнал својата работа на 18 февруари 1950 година со првата претстава, „Кир Јања“, и до денес го бележи големиот развој на театарската уметност и на продукцијата на врвни театарски претстави и актерски и режисерски имиња во македонската уметност на „штиците што живот значат“.

Програмата за одбележување на јубилејот е обемна и ќе се реализира од 17 до 23 февруари.

-Прилепскиот театар е формиран и работи од и со љубов кон театарската уметност. Седумдесет и пет години е голем јубилеј кој ја заслужува сета почит и спрема уметноста и спрема сите што биле и се дел од ансамблот. Прославата на јубилејот е со обемна програма од 17 па до 23 февруари и со гостувања на ансамблите од земјава. Ќе ја покренеме и дискусијата за театарската уметност, рече Михајло Миленкоски, раководител на Прилепскиот театар, кој од 2004 година функционира во склоп на Центарот за култура „Марко Цепенков“.

Во 75-те години се одиграни над 7000 претстави со преку 360 премиери кои ги виделе 1,7 милион гледачи. Но, ансамблот се соочува со мал број вработени.

-Ансамблот сега, за жал, брои 11 вработени. Се надевам дека наскоро ќе се зголеми бројноста со вработување, пред сѐ, на млади актери и театарски работници. Ние како ансамбл ќе им дадеме шанса на младите актери, рече Миленкоски.

Театарот сѐ уште фунционира во старата, речиси руинирана зграда. Најавите за нов театар сѐ уште се само најави.

-Таа проектна документација е аплицирана во Министерството за транспорт и врски. Проектот е поделен на два дела. Треба да се реновира Центарот за култура „Марко Цепенков“ како и доградба, односно градење на новата зграда за Театарот. За реновирањето на ЦК „Марко Цепенков“ мислам дека е стигната дозволата за градба, а за Театарот имаше технички промени. Тоа е изготвено и во тек е процедурата за дозволата за градба на театарската здрада.  Се надеваме дека таа процедура ќе заврши побрзо и сето друго останува на Министерството за култура и туризам и на Владата, објаснува Миленкоски.

Единствено што се знае е дека изградбата на нов театар е во програмата на Министерството за култура и туризам од 2025 до 2035 година.

Според актерката Даниела Иваноска, големиот јубилеј на театарот е огромен поттик и гордост.

-Радоста е огромна за ваков голем јубилеј. А кога станува збор за нов театар е повеќе од доцна. Ние 75 години славиме театарска уметност, но без театар, рече Иваноска.

Прилепскиот ансамбл има големи остварувања на домашната и на меѓународната сцена. На МТФ „Војдан Чернодрински“ има освоено 15 награди за најдобри претстави, има награди на меѓународна сцена во повеќе настапи, а меѓу најголемите се наградите на „Експонто“ во Љубљана и трите награди, меѓу кои за најдобра претстава во Средна Европа, на меѓународниот театарски фестивал „МЕСС“ во Сараево – со претставата „Тапани во ноќта“.

Најгледани и најодиграни претстави се „Солунски патрдии“ и „Од кол на кол“ од Коле Ангеловски со преку 100 одиграни претстави.

Во програмата за одбележувањето на јубилејот се претставите: „Роња“ на Театар за деца и младинци од Скопје, кој гостува на 17 февруари, и претставата „Хинкеман“ на Театар „Златен Елец“. На 18 февруари е претставата на домашниот театар – „Ученикот“, на 19 февруари гостува  МТЦ „Зона“ со претставата „Чернодрински се враќа дома“, на 20 февруари е „Вечера за глупаци“ на Велешкиот театар, на 21 февруари ќе гостува Народниот театар Битола  театар со претставата „Кокошка“, на 22 февруари публиката ќе ја види „Бура“ на Прилепскиот театар, а на 23 февруари е дебатата на тема „Од „Кир Јања“ до „Ученикот“ во просториите на театарот „Војдан Чернодрински“.