Нападот на Иран значи енергетски хаос: Монархиите од Заливот го предупредуваат Вашингтон

Земјите од Персискиот Залив, првенствено Саудиска Арабија, Оман и Катар, ги предупредија САД да не започнуваат нов воен напад врз Иран, наведуваат колумнистите Самер Саид и Омар Абдел-Баки во авторски текст за „Волстрит џурнал“.

Според нивните изјави, за време на приватни дипломатски контакти, арапските земји јасно ѝ ставиле до знаење на американската администрација дека евентуалниот напад врз Иран, како и обидот за соборување на владата во Техеран, би можеле да предизвикаат сериозни нарушувања на светскиот пазар на нафта. Ваквите потреси, се предупредува, директно би влијаеле врз американската економија.

Посебно внимание се посветува на можноста нападите врз Иран да го загрозат сообраќајот на танкери низ Ормутскиот теснец, еден од најважните енергетски коридори во светот, низ кој минува околу една петтина од глобалната трговија со нафта.

Авторите истакнуваат дека Ријад веќе го информирал Вашингтон дека не сака да биде вовлечен во евентуален конфликт меѓу САД и Иран. Саудиските власти, како што е наведено, немаат намера да дозволат користење на нивниот воздушен простор за напади врз Иран, со што јасно сигнализираат дека се дистанцираат од евентуална воена операција.

Американскиот претседател Доналд Трамп претходно изјави дека сериозно размислува за употреба на сила против Техеран и ги повика сојузниците на САД да го напуштат Иран, што дополнително ги разгоре загриженостите во регионот на Персискиот Залив.

Според „Волстрит џурнал“, Саудиска Арабија е особено чувствителна на она што го нарекува „растечка нестабилност“. Како мерка на претпазливост, властите во Ријад побараа од локалните медиуми да го ограничат известувањето за протестите и регионалните тензии, со цел да се намали ризикот од можни одмазднички мерки од страна на Иран.