Најдобрата фотографија од Олимписките игри изгледа како фотошоп. Еве како настана
Олимпискиот турнир во сурфање, олимписки спорт кој беше премиерно прикажан пред три години во Токио, се одржува на Тахити, француска територија во Пацификот, на дури 15.000 километри од Париз. На тој начин беше соборен рекордот за максимално растојание помеѓу местото на одржување на олимпиското натпреварување и официјалниот град домаќин.
Сурферите завршија со четвртото квалификациско коло, во кое најдобар резултат доби бразилскиот сурфер Габриел Медина (30), трикратен светски шампион. Тој доби оценка од 9,90 за неговиот настап, највисока во кратката историја на спортот на Игрите, а славеше фрлајќи се од висок бран додека штицата за сурфање леташе во другата насока.
Снимката ја направи фотографот на агенцијата Франс прес, Жером Брује, кој рече дека „условите беа совршени, брановите беа повисоки отколку што очекувавме“. Тој ја направил фотографијата додека се наоѓал на брод во близина, снимајќи ја надреалната слика со таква точност што на почетокот некои се посомневале во фотошоп или вештачка интелигенција.
„Значи, тој [Медина] е на задниот дел од бранот и не можам да го видам, а потоа се појави и јас направив четири фотографии, а една од нив беше оваа“, рече Брује.
„Не беше тешко да се фотографира. Тоа беше повеќе за предвидување на моментот и каде Габриел ќе го започне бранот“.
Но, Брује имаше знаење и искуство на негова страна – можеше да види како се приближува еден од најдобрите бранови на денот и знаеше дека Медина често прави ваква прослава на крајот на бранот.
Откако сликите се испраќаа автоматски од камерата до неговите уредници, реакцијата набрзо дојде, а Брује признава дека бил „малку шокиран“ од тоа. „Само го проверував мојот телефон на шестминутната пауза по снимањето и имав многу известувања на социјалните мрежи и помислив дека нешто се случува со оваа снимка и таа беше споделена на ESPN и помислив: „кул“.
„Многу е кул, убав кадар и многу луѓе го сакаат. Тоа навистина не е фотографија за сурфање, така што го привлекува вниманието на повеќе луѓе“, вели Брује, а на неговата фотографија изгледа како Медина да лета или лебди во воздухот.
Медина започна да сурфа како четиригодишно дете, на 11 го освои националното првенство, на 15 стана најмладиот победник на натпреварувањето во квалификациите за серии, а веќе на 17 години стана дел од елитата на сурфање.