Награди за најдобрите на Европскиот квиз на парите

Македонската банкарска асоцијација, Народната банка и Комисијата за хартии од вредност ги наградија учениците со најдобри резултати на Европскиот квиз на парите и нивните ментори

Активностите во сферата на финансиската едукација се и мора и натаму да бидат еден од приоритетите. Тоа се потврдува и во текот на ковид-кризата, којашто и покрај нејзиниот карактер не ги запре активностите за поттикнување повисока финансиска писменост. Конкретна потврда е годинешното издание на Европскиот квиз на парите, коешто заради пандемијата се одржа преку онлајн-платформи. На националниот натпревар учествуваа близу 500 ученици, а на големото европско финале најбројни беа учесниците од нашата земја, што уште еднаш потврдува дека вложувањата во финансиската едукација во изминатиот период даваат резултати, особено кај помладата популација.

Вчера, во Македонската банкарска асоцијација (МБА) и Народната банка се одржаа средби со европскиот вицешампион Христијан Андовски и со двајца од учениците коишто остварија најдобри резултати на националниот натпревар – Едон Хамбари и Антонио Јорданоски и нивните ментори Мерита Таири и Илчо Јорданоски, а учествуваше и Александра Бошковска-Спасовска – менторка на Андреј Шумански, којшто го освои второто место на националниот натпревар, но не беше во можност да присуствува на настанот. На средбата беа доделени наградите за остварениот успех.

Честитајќи им за постигнатиот успех, на натпреварувачите и на нивните ментори им беа врачени и симболични подароци од МБА и Комисијата за хартии од вредност, како и од Народната банка.

Претседателката на МБА, Маја Стевкова-Штериева, меѓу другото, нагласи дека МБА, сите нејзините членки и нејзините соработници секогаш ќе даваат максимална поддршка и поттик на младите луѓе коишто покажуваат интерес за продлабочување на своите знаења од областа на финансиите и економијата.

„Големо е задоволството кога успешно ќе се реализира еден ваков голем проект. МБА вложува во едукацијата на младите, зошто тие се нашата иднина и сите ние со збогатување на нивните знаења и образование треба да допринесеме до останат тука. Колку повеќе младите се едуцирани за финансиите, толку повеќе бизнисите или финансиските одлуки кои во иднина ќе ги започнат или донесат ќе бидат успешни. Повторувањето на успехот на европско ниво уште еднаш потврдува дека интензивното вложување во финансиската едукација на младите од земјата, веќе дава видливи резултати, како преку интересот на младите за стекнување знаења во областа на финансиите, така и преку подигнување на нивото на нивната финансиска писменост.“ – истакна Стевкова-Штериева. 

На средбата во Народната банка, гувернерката Анита Ангеловска-Бежоска истакна дека централната банка останува посветена на остварувањето на својата стратегиска определба и мисија да биде поддржувач и поттикнувач на младите луѓе коишто преку едукација и истражување сакаат да ги продлабочуваат своите знаења од областа на економијата и финансиите.

„Драго ми е што со активностите во сферата на финансиската едукација коишто Народната банка ги иницираше пред неколку години, успеавме да поттикнеме сестрани вложувања во оваа сфера, зашто вложувањето во финансиската писменост значи и вложување во стабилноста и развојот на финансискиот систем и економијата во целина. Фактот што веќе две години по ред, нашата земја учествува на најголемото европско натпреварување во сферата на финансиската едукација за млади и притоа две години по ред, наш претставник е европски вицешампион, нѐ обврзува натамошните вложувања и напори за поттикнување на интересот за финансиската едукација и финансиската инклузија да бидат и поголеми. Но, во исто време и да продолжиме да ги поддржуваме овие млади луѓе коишто во времето што е пред нас би требало да бидат едни од двигателите на финансиските текови во нашата економија.“ – порача Ангеловска-Бежоска.

 Таа изрази и задоволство што и преку вложувањата во финансиската едукација, банките ја потврдуваат својата улога на општествено одговорни носители на економскиот развој.

Инаку, учеството на нашата земја на Европскиот квиз на парите е во организација на Македонската банкарска асоцијација, во соработка со Народната банка и Комисијата за хартии од вредност, со поддршка од Министерството за образование и наука и Министерството за финансии.